КӘСІПОДАҚ ЖОЛДАДЫ – МӘСЛИХАТ ҚОЛДАДЫ
Бүгінгі таңда кәсіподақтар – еңбек адамының құқықтары мен мүдделерінің қорғалуына ғана емес, сондай-ақ оның еңбегінің қоғамнан лайықты бағасын алуға да күш салады. Соның айғағындай, «Қазақстандық салалық білім және ғылым қызметкерлері кәсіптік одағының Атырау облыстық ұйымы» ҚБ ағымдағы жылдың 4 маусымы күні Махамбет ауданының әкімі Ж.Б.Ахметовке халық ағарту ісіне зор үлес қосқан ардагер ұстаз Зәру Әтенованы 95 жасқа толуына байланысты марапаттауға ұсыныс берген еді. Бұл мәселені республикалық салалық кәсіподақтардың «Ұстаздық еңбек» және Махамбет аудандық «Жайық шұғыласы» газеттерінде де көтерген-ді.
Жуырда өткен аудандық мәслихаттың кезекті сессиясында халық қалаулылары есімі елге танымал ұстазға «Махамбет ауданының Құрметті азаматы» атағын беруге бірауыздан шешім қабылдады. Бұл – Тәуелсіздік күні қарсаңында аудан үшін ғана емес, барша облыс ұстаздары үшін қуанышты хабар болды.
Зәру апайымыздың жасөспірім шағы аштыққа, бойжеткен шағы зұлмат соғысқа тап болған, барлық саналы ғұмырын ұрпақ тәрбиесіне арнаған жан. Екінші дүниежүзілік соғысқа дейін мектепте алған білімімен ауылдық жерде сауатсыздықты жоюға белсене араласып, кейін 1942 жылы Жалғансай, 1964 жылы Есбол орта мектептерінде ұстаздық етті. «Қазақ ССР-і білім беру ісінің үздігі», «Тыл ардагері», «Еңбек ардагері», Ұлы Жеңістің көптеген мерейтойлық медальдерінің және мақтау қағаздардың иегері.
«Алты алаштың басы қосылса төр – мұғалімдікі» деп ұлы ақын Мағжан айтқандай, Махамбет ауданы әкімшілігі мен мәслихатының ардақты ұстаз З.Әтенованың еңбегін бағалағаны барша еңбек адамына берілген үлкен баға. Бұл сәтте педагогтардың мұңын жоқтап, жоғын түгендеп жүрген Атырау облыстық білім және ғылым қызметкерлері кәсіптік одағының лайықты жұмысын атап өтуге де болады.
Сандуғаш ҚАПСИХОВА,
Атырау облысы
