ҮЗДІК ҰСТАЗДАР МАРАПАТТАЛДЫ
Қазақстан Республикасының Тұңғыш Президенті күніне орай Жамбыл облысы Жуалы ауданында «Тәуелсіздік және Тұңғыш Президент» атты мерекелік іс-шара өтті. Жиынға жас мамандар, аудан ұстаздары мен білім беру ұйымы мен мекемелерінің басшылары қатысты.
Санитарлық талаптардың қатаң сақталуымен өткен шарада Елбасы Нұрсұлтан Назарбаевтың өмірбаяны мен қызмет хроникасы, металлург, қоғам және партия жетекшісінен саяси көшбасшыға дейінгі жолы, сондай-ақ егеменҚазақстанның қалыптасуы мен дамуының негізгі кезеңдерін, ішкі және халықаралық аренадағы экономикалық және саяси жетістіктерін, сіңірген еңбегі және Тәуелсіз елдің дамуына қосқан үлесі туралы баяндамалар оқылып, мәліметтер айтылды.
«Тұңғыш Президент күні – Тәуелсіз Қазақстан тарихындағы маңызды күн. Дүниежүзін пандемия жайлаған кезде ұстаздар қауымы жаңа оқу форматына бейімделе отырып жас ұрпаққа білім беру ісін бір күнге де кештеткен жоқ. Аудан ұстаздары Мемлекет басшысының, барша қоғамның сенімін ақтау үшін бар күш-жігерлерін жұмсады, солай жалғаса беретініне де сенімдімін. Осынау мереке күні, мінсіз еңбектеріңіз үшін алғыс білдіргім келеді», деп атап өтті аудандық кәсіподақ ұйымының төрайымы Гүлнұр Қадырбекқызы.
Салтанатты шара барысында кешегі келген жас маманнан ұлағатты ұстазға дейінгі нәтижесі бар білімді, білікті ұстаздар марапатталды. Марапаттау рәсімін Жуалы ауданы әкімдігінің білім бөлімінің басшысы Назиля Турмаханбетова мен аудандық кәсіподақ ұйымының төрайымы Гүлнұр Қадырбек жүргізді. Тәуелсіз Қазақстанның рухани және әлеуметтік дамуы жолында білім беру жүйесін дамытуға қосқан үлесі үшін ұстаздарға ҚР Білім және ғылым министрлігінің Құрмет грамотасы тапсырылды.
Г.Болатқызы,
Жамбыл облысы
