ТҰҢҒЫШ ПРЕЗИДЕНТ КҮНІНЕ АРНАЛҒАН ШАХМАТ ТУРНИРІ
Жамбыл облысы Тұрар Рысқұлов ауданында Қазақстан Республикасының Тұңғыш Президент күні мерекесіне арналған шахматтан турнир өтті. Спорттық шараның өтуіне мұрындық болған аудан әкімдігінің білім бөлімі мен Т.Рысқұлов ауданы білім қызметкерлерінің кәсіподақ комитеті.
Зияткерлік ойынға қызығушылық танытқан аудандық білім мекемелері мен ұйымдарының 27 педагогы қатысып, өзара бақтарын сынады. Жарыс ережесіне сай әйелдер мен ер адамдар өзара жекелей жарысқа түсіп, мықтыны анықтады.
- Елбасымыз Нұрсұлтан Назарбаев жастарды саламатты өмір салтын ұстануға, спортпен шұғылдануға әрдайым баулып, насихаттап келеді. Өзі де спорт түрлерінен гольф, теннис ойнағанды ұнатады. Ал зияткерлік ойындарға, оның ішінде шахматқа ерекше мән беретіндігін көпшілік жақсы біледі. Аудандық білім бөлімімен бірлесіп ұйымдастырған бұл жарыс қатысушыларға үлкен серпіліс сыйлады деп ойлаймын, - деді жарыстың марапаттау рәсімі кезінде аудандық кәсіподақ ұйымының төрайымы Айнұр Баймұратова.
Жарыс жеңімпаздары мен қатысушылардың барлығын аудандық білім бөлімінің басшысы Майра Базарова мен аудандық білім қызметкерлері кәсіподағының төрайымы Айнұр Баймұратова Алғыс хаттар мен бағалы сыйлықтармен марапаттады.
Перизат БАҚЫТ,
ЖАМБЫЛ облысы
-
Фото
-
