ҒАСЫР ЖАСАҒАН ҰСТАЗ
Ұстаз – ұлағатты есім. Шәкірттерін білім нәрімен сусындатып, тәлім-тәрбие беру, жақсы қасиеттерді бойына дарытып, адамгершілік рухта бағыт-бағдар беруде мұғалімдердің еңбегі зор. Осы салада жұмыс істеп, ғасыр жасаған ұстаздарымыз саусақпен санарлық. Осындай тұлғаның бірі – Анна Шевелева.
Талдықорған қаласының тұрғыны бүгін жүз жасқа толып отыр. Мерейтойдың иесін құттықтау үшін Алматы облыстық білім және ғылым қызметкерлері кәсіподақ ұйымының төрағасы Мэлс Төлепбергенов, төраға орынбасары Болат Тұрысбеков, педагогикалық еңбек ардагерлері Кеңесі төрағасының орынбасары Мықтыбек Рахымбек арнайы үйіне барып, хал-жағдайымен танысты.
Алакөл ауданының тумасы Анна Тимофеевна еңбек жолын білім беру мекемесінде мұғалім болып бастап, түрлі лауазымды абыроймен атқарды. Еңбегі еленіп, аудандық, қалалық және облыстық деңгейдегі марапаттарды иеленді.
Ұлағатты ұстаз екі қызды тәрбиелеп, олардан 4 немере, 5 шөбере көрген. Бүгінгі күні абыз ананың қыздары мен немерелері ізін жалғап, ұстаздық жолда аянбай еңбек етіп келеді.
Кейуананы құттықтаған кәсіподақ өкілдері жылы лебіздерін білдіріп, бағалы сыйлықтарын табыс етті. Әжей өзінің ғұмырының мәнді де, мағыналы шақтарын айтып, көрсетіліп жатқан құрметке алғысын білдіріп, батасын берді.
Алматы облыстық білім және ғылым қызметкерлері кәсіподақ ұйымының баспасөз қызметі
