ЕҢБЕКПЕН ЕСЕЙГЕН ЖАН
«Жаныңда жүр жақсы адам» деген сөздің байыбына бара бермейтініміз рас. Шын мәнінде, өзінің еңбегімен, білімімен, өнерімен озып шыққан, алайда біз оның болмысын жете танып, бағаламай жүрген жандар бар. Солардың бірі - еңбекпен есейген жан, өз ісінің білгір маманы, ардақты ұстаз - Мейрамгүл Мәдіғұлқызы.
Мейрамгүл Мәдіғұлқызы - жоғары санатты география пәнінің мұғалімі, үздік ұстаз және мектептің кәсіподақ ұйымының төрайымы. Ұжымда өзіндік орны бар ұстаз сабырлы мінезімен, қазақы болмысымен, ішкі мәдениетімен өзіне тартып тұрады. Мейрамгүл әпкейдің ұзақ жылдық еңбек жолы талай тағылымға толы, кейінгі жас мамандарға үлгі.
Ұстаз жолы – қиын жол. Адам баласының бойында Абай атамыз айтқандай ыстық қайрат, нұрлы ақыл, жылы жүректің болуы – өмір сүрудің басты заңдылығы болса, осы үш қасиетті шәкірттерінің бойына сіңіру – ұстаз атаулының бұлжымас міндеті екені даусыз. Мейрамгүл Мәдіғұлқызы мұғалім ретінде осы қағиданы берік ұстанып, әрқашан өзіне жоғары талап қоя біледі. Білімді де білікті, шығармашыл ұстаздың жолын жалғап, бүгінгі педагогика саласында жемісті еңбек етіп жүрген, жыл сайын Ұлттық бірыңғай тестілеуден жоғары көрсеткіштерге қол жеткізіп, пәндік олимпиадалардың, түрлі ғылыми жобалардың жеңімпаздары болған оқушылары көптеп саналады.
Мейрамгүл әпкейдің ұстаздығы өз алдына, кәсіподақ ұйымының сан салалы жұмыстарын дөңгелетіп әкететін шебер ұйымдастырушылығы да бөлек әңгіме. Қашан да ұжымның ауызбіршілігін сақтауда, ұжым мүшелерінің көңілін табуда, ортақ іске жұмылдыруда өзінің қоғамдық қызметін абыроймен атқарып келеді. Қандай мәселені болсын шешуде іскерлік танытып, оң шешімін табатын шеберлігін айтпай кетуге болмас. Тапсырылған істі шегіне жеткізбей тынбайтын мінезі жауапкершілігінің зор екенінің айқын дәлелі болса керек.
Бойына табиғат дарытқан ұстаздық ұлағатты істі абырой, басты борышым деп есептеген ұстаз оқу ісіндегі, қоғамдық қызметіндегі шығармашылық белсенділігі мен жеке тұлға тәрбиелеуде үздік нәтиже көрсеткені үшін көптеген қомақты жетістіктерге жетті. Облыстық «Ең үздік кәсіподақ көшбасшысы» байқауында жүлделі 1-орынды иеленді, «Қазақстандық білім және ғылым қызметкерлерінің кәсіподағына сіңірген еңбегі үшін» төсбелгісімен марапатталды. Аталған құрметтің барлығы жаны нұрлы, жүрегі сырлы, қайсар мінезді, көркем мәдениетті ардақты ұстаз, аяулы ана Мейрамгүл Мәдіғұлқызының ерен еңбегінің жемісі деп білемін.
Еңбегіңіз жанып, жасай беріңіз, аяулы ұстаз!
Дина АДЕНОВА,Қ.Сұлтанбеков атындағы шағын орталықты орта мектебінің
мұғалімі.Т.РЫСҚҰЛОВ ауданы,ЖАМБЫЛ облысы
-
Фото
-
