«МЕРКІДЕ» ӨТКЕН КАНИКУЛ
«Merke Radon» - Қырғыз Алатауының Меркі шатқалында теңіз деңгейінен 720 метр биіктікте орналасқан отандық шипажай. Мұнда радонға бай минералды су көзі бар. Судың құрамындағы радон газының емдік қасиеті өте жоғары, минералдылығы 300 мг/л. Ғалымдардың анықтауынша, радон адам организміне тері арқылы еніп, терідегі нерв нүктелеріне, сол арқылы бүкіл организмге әсер етеді. Шипажайда жылдың қай мезгілінде болмасын емдеу қалыпты өтеді. Мың түрлі аурудың дауасы мен шипасы осы шипажайда.
Аталған әсем табиғаты мен шипажайдың емдік шараларымен танысу мақсатында Жамбыл облысы білім және ғылым қызметкерлерінің жергілікті кәсіподағы ұстаздарға арналған демалыс турын ұйымдастырды. Турдың әр күніне арнайы бағдарлама жасалып, оның аясында түрлі шаралар ұйымдастырылды. Алғашқы күніміз «Меркі» шипажайына экскурсия жасаудан басталды. Демалушыларға SPA салондар, психологиялық кабинет, жабық емдік радонды бассейн, сауна, орыс моншасы, бильярд, «Мерей» көңіл көтеру орталығы, теннис орталығы, сұлулық салоны қызмет көрсетті. Емдік сауықтыру шараларымен қатар әсем табиғатын тамашалап, таза ауасын еркін тыныстауға мүмкіндік болды.
Демалыс барысында кәсіподақ мүшелеріне арнайы семинар ұйымдастырылып, демалушылар «Қызметкерлердің жұмыс уақыты мен демалыс уақыттары» тақырыбын талқылады. Ұстаздар төрт топқа бөлініп, өздерінің көкейлерінде жүрген сұрақтарын қойып, оларға заңгерлер жауап берді.
Шипажай әкімшілігі демалушыларға арнап экотуризм ұйымдастырды, «Сүйіндік» шатқалын, шипалы су шығатын бұлақтарды көрсетіп, емдік процедураларды да уақтылы қабылдауға жағдай жасады. Әр күннің кеші спортық шараларға, рояль жанындағы ән шырқау мен алау жанындағы дискотекаға ұласып отырды.
Турдың ақырғы күні «Осындай демалыс туры аясында білім саласы қызметкерлеріне берілген жолдамаға ие болғанымыз үшін ұйымдастырушыларға алғыс айтамыз» деп рахметін жаудырған кәсіподақ мүшелері бір-бірімен қимай қоштасты.
Жамбыл облыстық кәсіподақ ұйымының
Сарысу аудандық комитеті
-
Фото
-
