Аумақтық ұйымдардың жаңалықтары

Еңбек қауіпсіздігі мен еңбекті қорғау ең маңызды жұмыс. Білім беру ұйымдарында еңбек қауіпсіздігі мен еңбекті қорғау бойынша бақылауды жүзеге асыратын еңбекті қорғау жөніндегі техникалық инспектор. Оның басты міндеті – кәсіподақ мүшелерінің пайдалы және қауіпсіз еңбек жағдайларына байланысты құқықтары мен заңды мүдделерін қорғау, еңбек қауіпсіздігі бойынша заң нормаларының және техникалық талаптардың сақталуына қоғамдық бақылау жасау.

Жуырда Жамбыл облысы білім және ғылым қызметкерлерінің жергілікті кәсіподағының Сарысу аудандық комитетінің ұйымдастыруымен «Білім беру ұйымдарындағы еңбек қауіпсіздігін қамтамасыз ету бойынша нұсқаулықтарды жасау және оларды жүргізу тәртібі» тақырыбында семинар өтті. Білім беру ұйымдарының техникалық инспекторлары қатысқан семинарда өндірістік кеңестің атқаратын жұмысын заң талабына сәйкес жүргізу, оның ішінде нұсқамаларды дұрыс рәсімдеу бойынша ҚР еңбек кодексін, ұжымдық шартты, ҚР Денсаулық сақтау және әлеуметтік даму министрінің 2015 жылғы 30 қарашадағы «Жұмыс берушінің еңбек қауіпсіздігі және еңбекті қорғау жөніндегі нұсқаулықты әзірлеу, бекіту және қайта қарау қағидаларын бекіту туралы» №927 бұйрығын басшылыққа ала отырып жасалатындығы туралы филиал төрайымы Гүлмира Сұлтанбекова мен құқықтық инспектор Мәулен Әбдіров өз баяндамаларында айтып өтті.

Семинар барысында ұйымдастырушылар жоғарыда айтылған заң талаптарына сәйкес жұмыс беруші мен қызметкерлер арасында жасалатын нұсқамалардың әрқайсына жеке-жеке тоқталып, дұрыс рәсімдеу жолдарын және нұсқамаларды тіркеу журналдарын слайд арқылы көрсетіп, түсіндірді. Техникалық инспекторлар өздері жұмыс атқарып отырған ұйымдағы еңбек қауіпсіздігі шараларын қалай жүргізіп жатқандығы туралы айтып, пікір алмасты. Семинар соңы сұрақ-жауап сағатына ұласып, нәтижелі аяқталды.