КӘСІПОДАҚ – ЕҢБЕК АДАМЫНЫҢ СЕНІМДІ ТІРЕГІ
Ұлттық бәсекеге қабілеттілігін арттыру үшін педагогтардың жоғары мәртебесіне іс жүзінде көтеруіміз қажет. ҚР «Педагог мәртебесі туралы» Заңында қолдаудың кешенді шаралары қарастырылған.
Кәсіподақ ұйымы үшін мұғалімнің еңбегін лайықты бағалау –өте маңызды міндет болып қала бермек. Атап айтқанда, педагогтардың еңбегі мен әлеуметтік қорғалуы – кәсіподақтың назарында.
Демалу - адамдардың қалыпты өмір сүруі үшін тамақ пен су қажет сияқты жағдай. Оның негізгі мақсаты - еңбек ету процесінде жұмсалған күшті қалпына келтіру. Педагог қызметкерлерінің тынығуы, демалысы мен бос уақытын қызықты өткізу, рухани дамуына кәсіподақ үнемі көңіл бөліп келеді.
Осы мақсатта қараша айының 7-8 күндері көп жыл еңбек еткен мектеп директорлары мен балабақша меңгерушілері үшін аты аңызға айналған Бурабайда аудандық білім беру қызметкерлерінің кәсіподақ ұйымының қолдауымен «Табиғат аясындағы» демалысы ұйымдастырылды. Осындай табиғат аясындағы демалыс аудандық білім беру қызметкерлерінің кәсіподақ ұйымының ұйымдастыруымен алғашқы рет өткізіліп отыр.
Ауданымыздың 20 мектеп директорлары мен балабақша меңгерушілері Бурабайға экскурсияға шығып, «Хан асары», «Оқжетпес», «Жұмбақтас», Абылайхан алаңымен танысып, Бурабайдың қарағайлы орманындағы табиғатын тамашалады. Жүздері күлкіге толы, киелі мекенде демалыс күндерін өткізген білім саласының қызметкерлері бейне бір күздің суығын емес, оның жылы нұрын, ыстық тартар сәулесін сезініп, қуаныш лебіздерін білдірді. «Демалыс керемет ұйымдастырылған. Бізге тамаша табиғат төсінде құрмет көрсетіп жатқан кәсіподақ ұйымына ризашылығымыз шексіз!», «Жауапты қызметте үнемі шұғыл даярлықта жүретін мектеп директорларына осындай демалыстар қажет-ақ», «Білім саласында еңбек еткеніме 35 жыл болды. Бірақ, мұндай ұжымдық демалысты алғаш рет көріп тұрмын. Туған жердің табиғаты аясында, Бурабайдың тау-таспен танысуға мүмкіндік алдық. Демалыс уақытын бұлайша атап өту – ұстазға деген құрмет деп түсінемін» деген тілектерін айтып, ұжымдық демалыстан жоғары көңіл-күймен оралды.
Кәсіподақ ұйым мүшелерінің қажеттілігіне қарай жәрдем беру, мектепішілік және спорттық шараларға, демалыс күндерін өткізуге қолдан келгенше көмек көрсетуге тырысады.
А.Х.Мұстафин,Нұра ауданының білім беру
қызметкерлерінің кәсіподақ ұйымының төрағасы,
Қарағанды облысы
-
Фото
-
