АРДАГЕР ҰСТАЗ ҰЛЫҚТАЛДЫ
Саналы ғұмырын білім саласына арнаған ардагер ұстаз, Ақтөбе облысының, Мұғалжар ауданының тумасы Тасқалиева Сапура Жәңгерейқызы «Еңбек ардагері» медалімен марапатталды. Облыстық білім қызметкерлері кәсіподақ ұйымының өкілдері ардагерді үйіне құттықтап барып, министрлік марапатын табыстады.
Сапура Жәңгерейқызы - орыс тілі және орыс әдебиеті пәнінің мұғалімі. Еңбек жолын Браиловка орыс-қазақ мектебінде бастаған. 1963 жылдан бастап Құмжарған орта мектебінде оқу ісінің меңгерушісі, Құмжарған негізгі мектебінің директоры болып еңбек етті. Жем қаласындағы №2 орта мектебінде оқу ісінің меңгерушісі болды. Жалпы педагогика еңбек өтілі- 40 жыл.
Ол өз ісінің шебері, балаларға шексіз сүйініспеншілікпен қарап, олардың мүмкіндіктерін сезе білетін педагог. Бүкіл күш-жігерін балалардың ойлау қабілетін оятуға жұмсаған. Оның өзімен тағдырлас, замандас әр адамның маңдайынан сипап, жан-дүниесін түсінуі туа біткен асыл қасиеті болатын. Әр мәселенің түйінін бүкпесіз айтар маман, үлгі-өнегелі істерді насихаттаушы, ал отбасында сүйікті жар, аяулы ана, мейірімді әже. Қажырлы еңбегі үшін медальдармен, «Қазақстан Республикасының білім беру ісінің құрметті қызметкері» төсбелгісімен марапатталды. Бүгінгі таңда құрметті демалыста.
