ӘДІСТЕМЕЛІК КӨМЕК МАҢЫЗДЫ МӘСЕЛЕГЕ АРНАЛДЫ
Кәсіподақтың негізгі бағыттарының бірі – іс жүргізу жұмыстары болып табылады. Онда атқарылған жұмыстардың, жұмсалған қаржының есебі тігіліп, кәсіподақ ұйымының құжаттары жинақталады.
Осы бағытта Алматы облыстық білім және ғылым қызметкерлері кәсіподақ ұйымы бірқатар бастамаларды жүзеге асырып, өткен жылы барлық бастауыш кәсіподақ ұйымдарының төрағаларының қатысуымен форум өткізіп, әдістемелік нұсқаулық таратқан болатын. Аталған кітапша негізінде білім беру мекемелері іс-номенклатураларын қалпына келтірді. Облыстық ұйымның мамандары мен аудандық, қалалық филиалдардың төрағалары 170-ке жуық ұйымның жұмысымен танысып, әдістемелік көмек көрсетті.
Бұл шара ағымдағы жылдың 4 қараша күні облыстық ұйымға қарасты Ескелді аудандық филиалында жалғасын тауып, аудандық білім бөлімімен бірлескен жиын өтті. Жалпы білім беретін мектептердің құжаттарын ретке келтіру мақсатында ұйымдастырылған шарада Ескелді аудандық филиалының төрайымы А.Айтбузинова кәсіподақ жұмысының ілгерлегенін, арыз-шағымдардың азайғанын айтып, алдағы уақытта да әлеуметтік әріптестік негізінде жасалған келісім шартқа сәйкес аудандық білім бөлімімен бірлесе жұмыс істейтіндіктерін жеткізді.
Ал, аудандық білім бөлімінің басшысы М.Бектұров білім саласындағы өзекті мәселелерге тоқталып, ұстаздардың мәртебесін арттыруға арналған тың бастамаларды жүзеге асыру жолдарына тоқталды. Құжаттардың жинақталуына ерекше мән беру керектігін айтып, бірқатар тапсырмалар берді.
Білім беру мекемелерінің іс номенклатурасын жасақтау барысында ұсыныстар жинақталып, мекеме басшыларының бекітуімен барлық оқу орындарына жолданады. Мектепке дейінгі білім беру мекемелерініңде құжаттары біркелікті сақтап, ретке келтірілетін болады.
Ескелді аудандық филиалы,
Алматы облысы
