«ҚАЗАНДАҒЫ ҚАМҚОРЛЫҚ»
Алматы облысының орталығында орналасқан І. Жансүгіров атындағы Жетісу университетінің тәрбие және әлеуметтік жұмыс жөніндегі бөлімі мен университет кәсіподағы бірлесіп, «Қазандағы қамқорлық» байқауын ұйымдастырды.
1–30 қазан аралығында өткізілген байқаудың мақсаты – кураторлар мен студенттер арасында, академиялық топтарда рухани, мәдени, адамгершілік, жауапкершілік қасиеттерін дамыту, әлеуметтік-қоғамдық белсенділікті арттыру болып табылды.
Байқауға қатысушылар балалар және қарттар үйіндегі, жалпы мүмкіндігі шектеулі адамдарға қолдау білдіріп, экологиялық, мәдени-тарихи мұраны сақтау және дамыту, студент жастар мен әлеуметтік топтарға білім беру, шығармашылық және қайырымдылық іс-шаралар ұйымдастырып, барлық академиялық топтар өз үлестерін қосып, еңбек ұжымы арасында белсенділіктерін көрсетті.
Байқау нәтижесі бойынша бас жүлдені құқық және экономика факультетінің 4 курс студенттері мен курс кураторы Сағадат Айтқұлова иеленді. Ал, І орынды жаратылыстану факультетінің 1 курс студенттері мен курс кураторы Толқын Қалиасқарқызы, ІІ орынды гуманитарлық факультеттің 3 курс студенттері мен курс кураторы Мадина Тұмабаева, ІІІ орынды дене шынықтыру және өнер факультетінің 2 курс студенттері мен курс кураторы Бақыт Ахметовалар еншіледі.
Кураторларға университет кәсіподағының арнайы дайындаған бағалы сыйлықтары тарту етіліп, студенттер де университет атынан сыйлықтармен марапатталды. Бас жүлдеге Жаркент – Арасан шипажайына жолдама және Алматы облысы Еріктілер лигасының «Ашық жүрек» төсбелгісі табысталды.
І. Жансүгіров атындағы Жетісу
университетінің кәсіподағы
