«ҚУАН СӘБИ» РЕСПУБЛИКАЛЫҚ АКЦИЯСЫ АЛМАТЫ ОБЛЫСЫНДА ЖАЛҒАСЫН ТАПТЫ
ҚР Кәсіподақ Федерациясы мен «Дар» қоғамдық қорының ықпалымен бастау алған «Қуан сәби» қайырымдылық акциясына Алматы облыстық білім және ғылым қызметкерлері кәсіподақ ұйымы қолдау білдірді.
Облыстық кәсіподақ ұйымының төрағасы М.Төлепбергенов Кәмелетке толмаған жасөспірімдерді бейімдеу орталығына барып, елдегі жағдайды баяндап, жасөспірімдердің әрекеті, үлкендердің рұқсатынсыз өз еріктерімен үйден кету мәселе бойынша бірқатар жұмыстар жүргізілгенін, әлі де қоғамның өзекті тұсына көңіл бөліп, түсіндіру жұмыстарын жан-жақты қамтамасыз ету керектігін айтты.
Сонымен қатар аталған акцияның мақсатын айқындап, аймақта осындай 11 мекеменің барын, аудандық, қалалық филиалдар мен бастауыш кәсіподақ ұйымдарда акция аясында көмек көрсетіп жатқанын жеткізді. Облыстық кәсіподақ ұйымы тарапынан орталыққа қажетті медициналық маскалар, қолғаптар, антисептиктер мен спорттық ойындардың құралдарын табыстады.
Талдықорған қаласында орналасқан жасөспірімдерді бейімдеу орталығы директорының орынбасары Д.Шалғынбаевтың айтуынша 2011 жылдан бері мемлекеттік мекеме қадағалаусыз, панасыз қалған және ата-анасының немесе өзге де заңды өкілдерінің қамқорлығынсыз қалған балаларды әлеуметтік ортаға бейімдеу жұмысымен айналысып келеді. Бүгінгі күні орталықта қиын жағдайға тап болған үш пен он сегіз жас аралығындағы 22 бүлдіршін тәрбиеленуде. Елуден астам қызметкер жұмыспен қамтылған.
Акция барысында орталықтың тәрбиеленушілері сөз алып, акция ұйымдастырушыларына алғыстарын білдіріп, жұмыстарына табыс тіледі.Шара соңында облыстық ұйымның бас маманы Л.Сағынғалиқызы Кәмелетке толмаған жасөспірімдерді бейімдеу орталығы бастауыш кәсіподақ ұйымының төрайымы Ә.Нұрманованың жұмысымен танысып, әдістемелік көмек көрсетті.
Алматы облыстық білім және ғылым қызметкерлері
кәсіподақ ұйымының баспасөз қызметі
кәсіподақ ұйымының баспасөз қызметі
-
Фото
-
