«ҰЛАҒАТТЫ ҰСТАЗҒА, ЫСТЫҚ ЫҚЫЛАСПЕН»
Мұғалімдер күніне орай Алматы облыстық білім және ғылым қызметкерлерінің кәсіподақ ұйымы «Ұстаз аты биік, әрі мәңгілік» атты мерекелік шарасын өткізді.
Шара барысында облыстық кәсіподақ ұйымының төрағасы Мэлс Төлепбергенов мерекелік құттықтауын жеткізіп, «Білімді ел» республикалық газетінің бастамасына қолдау білдіріп, «Ұлағатты ұстазға, ыстық ықыласпен» әлеуметтік жобасы аясында білім берген мұғалімі Мырзахан Жебегеновке басылымның бір жылдық жазылымын тарту етті.
Ардагер ұстаз Мырзахан Рыстайұлы 40 жылдан астам уақыт білім беру саласында жұмыс істеп, мыңдаған шәкірт тәрбиелегенін айтып, қазіргі таңда әр салада жұмыс істеп жүргенін жеткізіп, шәкіртінің бірі де, бірегейі Мэлс Құлмұханұлының жеткен жеткен жетістігіне тоқталды. Жұмысына сәттілік тілеп, ақ батасын берді.
Аталған айдарға аудандық, қалалық филиалдардағы төрағалар, кәсіподақ белсенділері, жас мамандар белсене қатысып, облыс бойынша жалпы саны - 22 ұстазға «Білімді ел» газетінің бір жылдық жазылымы табыс етілді. Басылымға жазылу алдағы уақытта да жалғасын табатын болады.
Алматы облыстық білім және ғылым
қызметкерлері кәсіподақ ұйымының баспасөз қызметі
