ЖАМБЫЛДЫҚ МАМАНДАР ЖЕҢІМПАЗ АТАНДЫ
Жамбыл облысы Жамбыл ауданында білім саласы мамандарының бір шоғыры аудан әкімдігі білім бөлімінің әдістемелік кабинетінде еңбек етеді. Олардың еңбегі ескерусіз қалған емес. Оған дәлел, жуырда қорытындысы белгілі болған республикалық байқауда аудан әкімдігі білім бөлімінің әдістемелік кабинеті үздік деп танылды.
Мерей өсірген марапатты Жамбыл облысы білім және ғылым қызметкерлерінің жергілікті кәсіподағының төрағасы Ерұлан Мағзымбеков аталған бөлімдегі әдістемелік кабинеттің меңгерушісі Қымбат Қыпшақбаеваға салтанатты түрде табыстады. Жеңімпаздарға бағалы сыйлықтан бөлек әдістемелік көмек ретінде «Білімді ел» газетіне алдағы жылға жазылым туралы түбіртек табыс етілді.
Марапат мұнымен аяқталмады. Биыл білім саласында жылдағыдай демалыс, сауықтыру шаралары деген сөз аталмады. Неге? Себебі, аты жаман індеттің алдын алу үшін кейбір жоспарларды кейінге шегеруді Мемлекет басшысы Қасым-Жомарт Тоқаев әр мәлімдемесінде айтып келеді. Осы ретте ұстаздарды ынталандыру мақсатында аудандағы Б.Кейкиев атындағы орта мектептің орыс тілі пәнінің мұғалімі Динара Әмірсейітоваға Қазақстандық салалық білім және ғылым қызметкерлерінің кәсіподағы атынан ноутбук сыйға берілді.
Еске салайық, қазіргі оқыту жүйесіне байланысты елімізде планшет, ноутбук, компьютер сияқты құрылғылардың дәуірі жүріп тұр. Ал, біздің облыс осы гаджеттермен жабдықталу бойынша республика көлемінде көш бастап тұр.
Перизат БАҚЫТ
