КӘСІПОДАҚ ҰЙЫМЫ ШӘКІРТАҚЫ ТАҒАЙЫНДАДЫ
Алматы облыстық білім және ғылым қызметкерлері кәсіподақ ұйымы жоғарғы сынып оқушылары арасында екінші жыл қатарынан «Ұстаз болғым келеді-2020» эссе байқауын өткізді.
Облыс көлемінде мектеп түлектерін мұғалім болуға насихаттау жұмыстарын жүргізудің арқасында соңғы кездері ұстаз мамандығына деген сұраныс көбеюде. Өткен жылға қарағанда биыл байқауға қатысушылар санының артуы осының айғағындай.
Байқау ережесі барлық білім беру мекемелеріне жіберіліп, алдымен іріктеу және қорытынды кезеңдері өтті. Ұстаз деген ұлы мамандыққа қызығушылық танытқан 112 оқушының 28–і облыстық кезеңде бақ сынап, Көксу, Кербұлақ, Алакөл аудандық және Текелі қалалық филиалдарының атынан сынға түскен жоғарғы сынып оқушылары өзара жүлделі орындарды иеленді. Жеңімпаздардың ұлттық тестілеуден аз балл алуына, сәйкесінше өзге оқу орындарына түсулеріне байланысты тағайындалған шәкіртақы төленбеген еді.
Күні кеше бұл мәселе облыстық кәсіподақ ұйымының атқару комитетінде қаралып, қорытынды кезеңде әділқазы алқаларының бағалауымен V орынды еншілеген Салима Құсманға шәкіртақы тағайындалды.
Алматы облыстық білім және ғылым қызметкерлері кәсіподақ ұйымы төрағасының міндетін атқарушы Самал Бакирова және І.Жансүгіров атындағы Жетісу университетінің тәрбие жұмысы және әлеуметтік мәселелер жөніндегі проректоры Болат Сериев білімгерді арнайы құттықтап, шәкіртақы тағайындалғанын растайтын сертификатты табыс етті.
І.Жансүгіров атындағы Жетісу университетінде «Қазақ тілі мен әдебиеті пәнінің мұғалімі» мамандығы бойынша ақылы бөлімде білім алушы Салима Сымбатқызы қуанышымен бөлісіп, байқауды ұйымдастырушыларға алғысын білдірді. Және де бұндай шаралардың жиі өткізілуі жастарға серпін беріп қана қоймай, оларға жігер сыйлайтынын жеткізді.
Алматы облыстық білім және ғылым
қызметкерлері кәсіподақ ұйымының баспасөз қызметі
-
Фото
-
