МЕЙІРІМ СӘУЛЕСІН ТҮСІРДІ
Жаһанды дүр сілкіндірген індеттің таралуы халқымызға өз зардабын тигізбей өтпеді. Білім ордалары қашықтықтан оқытуға көшіп, бірқатар жұмыс орындары жабылып, атаулы қызмет иелеріне үйде отырып жұмыс істеуге тура келді. Осындай дүрбелең сәттің аз қамтылған отбасылар үшін де оңайға соқпағаны анық.
«Біз біргеміз» акциясы аясында Атырау облысында еріктілер штабы құрылып, мұқтаж жандарға жан-жақты қолдау көрсетілді. Қайырымдылық шарасы әлі де өз жалғасын табуда. Жуырда «Жүрегім толы мейірім» атты қайырымдылық акциясы Нұрсая ықшам ауданында орналасқан жалпы білім беретін №37 орта мектебінде өтті. Шараны Қазақстандық салалық білім және ғылым қызметкерлері кәсіптік одағының Атырау облыстық ұйымының Атырау қалалық комитеті ұйымдастырды. Қоғамдық бірлестік төрағасы Қ.Сүндетұлы және Атырау қалалық комитетінің төрағасы Б. Мұсагалиев өз сөздерінде жұртшылықты індет кезінде болып жатқан оқиғалар мен шектеулерге түсіністік танытуға шақырып, қолдан келгенше көмек көрсетілетіндігін атап өтті. Облыстағы білім мекемелерінде қызмет атқарып жүрген аз қамтылған қызметкерге кәсіподақ тарапынан қолдау көрсетілді.
