Аумақтық ұйымдардың жаңалықтары

Үстіміздегі жылдың 19-21 мамыр күндері Қазақстандық салалық білім және ғылым қызметкерлері кәсіподағының төрайымы Мұқашева Айгүл Мақсатқызы мен құқықтық жұмыстар жөніндегі бөлім басшысы Қыдырбаева Райхан Мамашиқызы Түркістан қалалық білім және ғылым қызметкерлері кәсіподақ комитетінің «Оқу әдістемелік орталығында» болып, комитеттің атқарып жатқан жұмыстарымен танысты. Белсенді кәсіподақ мүшелерінің еңбегін бағалау мақсатында Салалық кәсіподақ басшысы Түркістан қаласындағы Хамза атындағы №2 жалпы орта мектебінің бастауыш кәсіподақ ұйымының төрағасы Абдураимов Бахтияр Кахарұлына «Ы.Алтынсарин» төсбелгісін табыстады.
- Ұстаздардың құқығын қорғауда аянбай еңбек етіп, кәсіподақ мүшелеріне қабылданған Заңдарды, Үкімет қаулыларын, шешімдерді дер кезінде сауатты жеткізу, саладағы атқарылған жұмыстарды, жаңалықтарды ғаламтор беттеріне жариялап, хабардар ету әріптестеріңіз үшін үлкен көмек. Бұл жұмыстарды абыроймен атқарып, өңірдегі кәсіподақ қозғалысының дамуына үлес қосқаныңыз үшін Сізге алғыс айтамыз, - деді А.Мұқашева.
Бахтияр Қахарұлының жас ұрпаққа саналы тәрбие, сапалы білім берудегі сүбелі еңбегі де тілге тиек етілді.
Әріптесімізге тағылған төсбелгі қалалық кәсіподақ комитеті үшін үлкен мақтаныш, зор сенім. Сеніміміз серік, бірлігіміз берік болсын, әріптестер!