ҚЫЗМЕТКЕРЛЕРДІҢ ҚҰҚЫҚТАРЫН ҚОРҒАУ – БАСТЫ БАСЫМДЫҚ
Қазақстандықсалалық білімжәне ғылым қызметкерлерікәсіподағының Жамбыл облыстықұйымының кезекті онлайн жиынында кәсіподақтарға заңмен берілген құзыреттер аясында жұмыскерлердің құқықтары мен мүдделерін қорғау, кәсіподақ мүшелерін әлеуметтік қолдау және материалдық көмек көрсету мәселелері қаралды.
Кәсіподақ төрағасы Ерұлан Мағзымбеков алдағы уақытта түсінбеушіліктер орын алмас үшін білім беру ұйымдарының төтенше жағдай кезіндегі қызметін ұйымдастырумен байланысты мекеме басшыларының тарапынан қабылданатын бұйрықтардың дұрыс рәсімделуіне баса назар аудару қажеттігін, еңбек дауларын болдырмау үшін қызмет жасап жатқан және жұмысын тоқтатқан мекеме қызметкерлерінің еңбек ақысы лайықты төленуін бақылауда ұстауды тапсырды.
- Құқықтық қызмет әрбір кәсіподақ мүшесіне жетіп, оған тиісті көмек қолын созуы өте маңызды. Әр кәсіподақ мүшесі өзіне тиесілі жалақысын толық алуы керек. Әр кәсіподақ мүшесінің артында оның отбасы тұрғандығын естен шығармаған жөн, - деді Ерұлан Сәбенұлы.
Онлайн жиында аудандардың және Тараз қалалық филиалдың төрағалары өз аймағындағы мәліметтерден ақпарат берді. Кәсіподақ филиалдарынан түскен мәліметтерге сәйкес облыс бойынша 33 260 педагог өз қызметтерін қашықтықтан оқыту арқылы жүргізуде. Ал 9802 педагог-қызметкер дәстүрлі түрде өз қызметтерін жалғастыруда.
«Жұмыстың тоқтап қалу» режиміне көшірілген 6473 қызметкерге еңбек кодексінде көзделген минималды кепілдік емес, ұжымдық шарттармен көзделген «ағымдағы жалақысын» сақтау, кей өңірлерде, әсіресе балабақша қызметкерлеріне Төтенше жағдай жөніндегі өңірлік комиссия шешіміне сәйкес толық жалақы төленуде. Кестеден тыс еңбек демалысына кеткен 5655 қызметкерге тиесілі әлеуметтік төлемдердің кешіктірілмей берілуі кәсіподақ назарында.
Төтенше жағдай кезінде кәсіподақтардың негізгі басымдықты - кәсіподақ мүшелігімен қамтылған сала өкілдерінің еңбек қатынастарын дұрыс ұйымдастыруының нәтижесінде 428 қызметкер ғана жалақысы сақталмайтын демалысқа жіберілген.
Жалпы төтенше жағдай режимі енгізілгелі бері кәсіподақ заңгерлері еңбек заңдылығына байланысты 43 жазбаша, 1241 ауызша сұрақтарға жауап берді.
Перизат БАҚЫТ
