Қамқоршылық Кеңесі өз жұмысын қорытындыланды
Бүгін Талдықорған қаласындағы «Айналайын» балалар үйі жанындағы қамқоршылық Кеңесінің отырысы өтті. Кеңес төрағасы Әбдіқадыров Садық Нұрсапаұлының жетекшілігімен өткен отырыстың күн тәртібінде тәрбиеленушілердің тамақтану сапасы, қысқы демалыс кезінде балалардың бос уақыты өткізу сияқты өзекті мәселелер қаралды.
Күн тәртібіндегі бірінші сұрақ бойынша балалар үйінің диетолог мейірбикесі Айгүл Жетмекованың есебі тыңдалды. Айгүл Желтайқызы өз сөзінде ас мәзірі балалардың жас ерекшелігіне сай жасалатындығын, асхана тазалығы мен азық-түліктің сапасы мекеме басшылығыныңкүнделікті назарында екендігін айтты.
Екінші мәселе бойынша «Айналайын» балалар үйі директорының тәрбие ісі жөніндегі орынбасары Жанайбекова Мөлдір Сейдахметқызы сөз алып, тәрбиелеруншілердің қысқы демалысы арнайы жоспарға сай өтетіндігін, күнделікті шаралар жоспарланғанын айтты. Атап айтқанда, 90 бала Бикен Римова атындағы драма театрында өтетін «Сиқырлы айна» жаңажылдық ертегісіне, 15 жеткіншек «Президенттік шыршаға» қатысатындығын, сонымен қатар, «Қызыққа толы Жаңа жыл» тақырыбында сурет көрмесі, қабырға газеті байқауы, «Ең көркем безендірілген топ», «Сиқырлы қар қалашығы» т.б. байқаулар, көптеген қызықты шаралар өтетін жеткізді.
Кеңес төрағасы өз сөзінде балалардың дұрыс тамақтануына аса көңіл бөліну қажеттігін айтып, азық-түліктің дәрумендер мен ақуызға бай болуын қадағалауды тапсырып, қысқы демалыс кезінде өтетін көпшілік шаралар кезінде балалардың қауіпсіздігіне көңіл бөлу қажеттігін ескертті.
Жиын соңында Садық Нұрсапаұлы қамқоршылық Кеңесінің 2019 жылы атқарған жұмысын қорытындылап, 2020 жылға арналған жұмыс жоспарын ұсынды.
Бүгінгі күні Алматы облысы орталығындағы «Айналайын» үйінде барлығы 91 бала тәрбиеленуде.
Алматы облыстық білім және ғылымқызметкерлері
кәсіподақ ұйымыныңбаспасөз қызметі
