Жас ұстаздардың «Жайдарман» ойыны
Жастар жылының аяқталуына орай «Алматы облыстық білім және ғылым қызметкерлерінің кәсіподақ ұйымы» қоғамдық бірлестігі Панфилов аудандық филиалының жанынан құрылған жастар Кеңесі «Жайдарман» ойынын өткізді.
Оған аудандық білім беру мекемелеріндегі жас ұстаздардан құралған командалар қатысып, ережеге сәйкес үш кезеңде бақтарын сынады.
Алғашында жас ұстаздар өздерін таныстырып, білім ордаларындағы еңбек ұжымын насихаттап, «Бес әзіл»сайысында команда белсенділері ұстаздардың бүгінгі бейнесін әзілге араластырып, мәртебесін көтеруге арналған ұсыныстарын жеткізді. Ал, соңғы кезеңде әр топ алдынала дайындаған өнерлерін көрсетіп, шеберіктерін шыңдады.
Б. Момышұлы атындағы орта мектебінде өткен тартысты ойында «Алматы облыстық білім және ғылым қызметкерлерінің кәсіподақ ұйымы» қоғамдық бірлестігі Панфилов аудандық филиалының маманы Нұрбай Ұлжан, филиал жанынан құрылған жастар Кеңесінің төрағасы Сайранұлы Еламан, және Б.Момышұлы атындағы орта мектебінің бастауыш кәсіподақ ұйымының төрайымы Роза Алимжановақатысушылардың өнеріне баға беріп, жүйріктерді анықтады.
Бағы мен бабы келісіп, бірінші орынды және «Жастар жылы» кубогын Б. Момышұлы атындағы орта мектебінің «JasStar» тобы, екінші орынды Сатай батыр атындағы орта мектебінен келген «Таң қалмаңыз!» тобы, үшінші орынды Айдарлы орта мектебінен келген «Жайдарлы» тобы иеленіп, Панфилов аудандық кәсіподақ филиалының дипломын еншіледі.
Сондай-ақ, аталған шараға қатысып, белсенділік танытқан Абай атындағы орта мектебінің «Абай like» тобы аудандық кәсіподақ филиалының алғыс хатымен марапатталды.
Нұрбай Ұлжан,«Алматы облыстық білім және ғылым қызметкерлерінің
кәсіподақ ұйымы» ҚБ Панфилов аудандық филиалының маманы
-
Фото
-
