Алматы облысында «Әйелдерге қатысты зорлық-зомбылықсыз 16 күн» акциясы өтті
Бүгін Алматы облыстық білім және ғылым қызметкерлерінің кәсіподақ ұйымы Талдықорған аумақтық әйелдерді қолдау орталығымен бірлесе «25 қараша – әйелдерге зорлық-зомбылық көрсетуді жою туралы халықаралық күні» аясында және 2019 жылы Халықаралық еңбек ұйымы қабылдаған № 190 Конвенцияның міндеттерін қолдау мақсатында «Әйелдерге қатысты зорлық-зомбылықсыз 16 күн» акциясын ұйымдастырды.
Шара Талдықорған гуманитарлық-техникалық колледжі білімгерлерінің қатысуымен өтті.
Кездесу барысында Алматы облыстық білім және ғылым қызметкерлері кәсіподақ ұйымының бас маманы Л.Сағынғалиқызы ресми мәліметтер бойынша Қазақстанда әйелдерге күш көрсету оқиғалары көбейгенін, түрлі зорлықтың салдарынан жыл сайын елімізде 400-ге жуық әйел адамның көз жұматындығын, биылғы жылдың маусым айында қабылдаған № 190 Конвенциясын қолдау және бұл мәселені назардан тыс қалдырмау мақсатында Салалық кәсіподақ ұйымы әйелдердің зорлығына қарсы екендігін жеткізді.
Ал Талдықорған аймақтық әйелдерді қолдау орталығының төрайымы Нұрмұханова Жанар Болатқызы әйелдерге қатысты зорлық-зомбылық түрлерін сипаттап, Алматы облысы бойынша статистикалық деректерге және 1998 жылы құрылған аумақтық әйелдерді қолдау орталығының қызметіне тоқталды. Заңгер білімгерлердің «Өңірде әйелдердің құқы қалай қорғалуда?», «Отбасында зорлық орын алған жағдайда қандай әрекет жасау керек?» - деген сұрақтарына жауап берді.
Дөңгелек үстел басында өткен кездесуде жастар көкейлерінде жүрген сауалдарына жауап алды, пікірлерімен алмасты, тақырыптық бейнероликті көріп, «Әйелдерге қатысты зорлық-зомбылықсыз 16 күн» акциясын қолдайтындықтарын жеткізді.
Алматы облыстық білім және
ғылым қызметкерлері кәсіподақ
ұйымының баспасөз қызметі
-
Фото
-
