Аумақтық ұйымдардың жаңалықтары

Жамбыл облысы білім және ғылым қызметкерлерінің жергілікті кәсіподағының Оқу-әдістемелік орталығының жоспарына сай қарашаның 20-21 күндері кәсіподақ үйінің мәжіліс залында Тараз қаласы мен аудандық білім мекемелері мен ұйымдарының қаржы қызметінің мамандарына арналған семинар өтті. «Бюджеттік сала мекемелеріндегі қаржы-шаруашылық қызметінің түйткілдері» тақырыбындағы семинардың алғашқы күні мектепке дейінгі білім мекемелерінің, ал екінші күні облыстық білім басқармасына бағынысты мекемелер мен кәсіпорындардың қаржы қызметкерлеріне арналды. Екі күннің ішінде барлығы 58 маман білімдерін жетілдіруге мүмкіндік алды.
Семинар барысында кәсіподақ модераторлары Ерұлан Мағзымбеков, Жанболат Орынбеков пен Берік Баймағамбетов бухгалтердің функционалдық міндеттеріне тоқталып, білім саласындағы азаматтық қызметшілерді аттестаттаудан өткізу тәртібі мен шарттарын түсіндірді, еңбекақы төлеу мәселесіндегі түйткілдерді Ұжымдық шарттың нормалары арқылы шешудің мысалдарына тоқталды. Ал жұмыс уақытын есепке алу мен орташа жалақыны есептеу тәжірибесінде кездесетін келеңсіз жағдайлар мен олардың алдын алу мәселесін Кәсіподақтың кадр жөніндегі маманы Әлия Джолшибекова түсіндіріп өтті.
Семинар жұмысына арнайы шақырылған Жамбыл облыстық Тексеру комиссиясының бас инспекторы Ермек Қарабаев пен Жамбыл облысы бойынша ішкі мемлекеттік аудит департаментінің бөлім басшысы Ерзат Әліпбаев бюджеттік мекемелер мен ұйымдарда ішкі мемлекеттік аудит және қаржылық бақылау жүргізу қағидалары туралы айтты. Құзырлы органдардың өкілдері мемлекеттік аудит барысында қаржы қызметі мамандары тарапынан жиі орын алатын қателіктерді көрсетіп, олардың алдын алудың жолдарын түсіндірді. Келісім-шарттар жасау, іс-сапар шығындарын төлеу, мемлекеттік сатып алу кезінде қолданыстағы заңдар мен бюджеттік кодексті ұстану тақырыбын әңгімеледі.
Сұрақ-жауап сағатында семинар тыңдаушылары түрлі сұрақтар қойып, маман жауаптарын алды. Барлық қатысушыларға семинарға қатысқандығын растайтын куәліктер табысталды.

Бейбіт БЕКНАЗАРОВ,
ЖАМБЫЛ облысы