Аумақтық ұйымдардың жаңалықтары

«Алматы облыстық білім және ғылым қызметкерлерінің кәсіподақ ұйымы» қоғамдық бірлестігі Алакөл аудандық филиалына қарасты Сапақ орта мектебінде «Ұстаз мәртебесі – заман талабы» тақырыбында дөңгелек үстел өтті.
Жиынға Алакөл аудандық филиалының төрағасы Кенжебек Алпысбаев, мектеп директоры Айнұр Ахметханова, бастауыш кәсіподақ ұйымының төрағасы Салтанат Көкенова және еңбек ұжымы толық қатысты.
Шарада алдымен Мемлекет басшысы Қасым-Жомарт Тоқаевтың Жолдауынан үзінділер көрсетіліп, білім беру саласы туралы айтылған тапсырмалар нақтыланды.
Сонымен қатар, еңбек ұжымы «Педагог мәртебесі туралы» заң қабылданып, ұстаздардың қоғам алдында абыройы артатынына сенім білдірді.
Кездесуде математика пәнінің мұғалімі, еңбек ардагері Гүлнар Бекова ұстаз мәртебесінің тек қана мұғалімдердің әлеуметтік жағдайын жақсартумен байланыстыру жаңсақ пікір ретінде қарастырып, әр мұғалім заман талабына сай білім беруі үшін еңбек етуі керегін жеткізіп, әсіресе жастарды белсенді болуға шақырды. Ал, Мадина-бану Ақпарова мен Ақмарал Қабылханова тыңбай ізденіп, еңбектенуден шаршамаған мұғалімнің мәртебесі әрдайым жоғары болатынын айтып, ұлағатты ұстаздардың барлық жағдай өздеріне байланысты екенін тілге тиек етті.
Дөңгелек үстел барысында Алакөл аудандық филиалының төрағасы Кенжебек Сыбағатұлы жас жеткіншектерге саналы тәрбие, сапалы білім беру үшін ұжымдағы жұмыс атмосферасының атқаратын рөліне тоқтала келіп, білім саласының соңғы жаңалықтарымен бөлісті. Сондай-ақ, шарада айтылған ойлардың барлығы орынды екенін айтып, ұстаздар қауымының жұмысына сәттілік тілеп, жасаған жұмыстарына алғыс білдірді.

А.Асубаева,«Алматы облыстық білім және ғылым
қызметкерлерінің кәсіподақ ұйымы»
қоғамдық бірлестігі Алакөл аудандық
филиалының маманы