Аумақтық ұйымдардың жаңалықтары

Кәсіподақ мүшелеріне арнап, Алматы облыстық білім және ғылым қызметкерлерінің кәсіподақ ұйымы екі күндік ұстаздар арасында спартакиада ұйымдастырды.
Оған облыстық білім басқармасы басшысының орынбасары Майгүл Омарова, облыстық дене шынықтыру және спорт басқармасының басшысы Нұрбақыт Теңізбаев, облыстық кәсіподақтар орталығы төрағасының орынбасары Қахарман Жақсылық, аудандық, қалалық филиалы, жоғарғы және арнаулы оқу орындарынан 14 команда 400-ден астам ұстаз қатысты.
Спорттық шараның ашылу салтанатында қатысушы командалар ортаға шақырылып, Қазақстан Республикасының Гимні орындалды.
Алғашқы құттықтау сөзін Алматы облыстық білім және ғылым қызметкерлері кәсіподақ ұйымының төрағасы Садық Әбдіқадыров алып, екі жылда бір рет өткізілетін жарыстың мақсатын айқандап, салалық кәсіподаққа 95 жыл толғанын, орталық комитетте жаңадан төраға сайланғанын және қоғамдық бірлестіктің жұмысын қысқаша баяндап, жарыс қатысушыларына сәттілік тіледі.
Жоғарыда аты аталған мекеме басшылары ұстаздарға арнап өздерінің жылы лебіздерін жеткізді.
Ал, бас төреші Равиль Хамитов қатысушыларды ережесімен таныстырып, шараны ашық деп жариялады.
Командалар волейбол, шағын футбол, дойбы, шахмат, тоғызқұмалақ, үстел теннисі сынды спорт түрлерінен бөлініп, қатысушылар өзара бақтарын сынап, мықтыларды анықтау үшін ойындарды бастады.
Жарыс қорытындысы 30 қазан күні жабылу шарасында жарияланады. Екі күндік шарада жеңімпаз атанған командаларға облыстық ұйымның дипломдары мен ақшалай сыйлығы табысталады.

Алматы облыстық білім және ғылым қызметкерлері
кәсіподақ ұйымының баспасөз қызметі