ІС ТҮЙІНІН КАДР ШЕШЕДІ
Жамбыл облысы білім және ғылым қызметкерлерінің жергілікті кәсіподағының ұйымдастыруымен 23-24 қазан күндері «Білім мекемелеріндегі кадрлық іс құжаттарды жүргізу тәжірибесі» тақырыбында семинар өтті. Кәсіподақ үйінің Мәжіліс залында өткен семинарға аудандық білім бөлімдерінің, жалпы білім беретін мектептер мен балабақшалардың, сондай-ақ облыстық білім басқармасы бағынысындағы білім мекемелерінің кадр қызметінің мамандары мен іс-жүргізушілері қатысты.
Кәсіподақтың Жамбыл облыстық ұйымының қызметі туралы деректі фильмнен соң алғашқы сұрақ бойынша Кәсіподақтың облыстық ұйымының төрағасы Ерұлан Мағзымбеков ұйымның негізгі мақсат-міндетімен таныстырып, кәсіподақ мүшелігінде болудың артықшылықтарын айтып, тыңдаушылардың санасында кәсіподақ туралы жақсы түсінік қалыптастыра білді. Ал төраға орынбасары-құқықтық қызмет басшысы Берік Баймағамбетов «Ұжымдық шарт - мекемедегі еңбек қатынастарын реттеу құралы» тақырыбына тоқталып, ұжымдық шартта еңбек жағдайы мен жалақы төлеу, жұмысшылардың әлеуметтік және тұрмыстық мәселелерін шешу, жұмыс беруші тарапынан берілетін кепілдіктер мен жеңілдіктер толығымен жазылғанын, сол кепілдіктерді қызметкерлердің әлеуметтік-экономикалық жағдайларының жақсаруына, құқығының әркез қорғалуына қарай пайдалану қажеттігіне тоқталды.
Семинар барысында құқықтық еңбек инспекторлары Арман Стыбаев пен Әлия Джолшибекова да бірқатар сұрақтарды қаузады. Арман Мұратханұлы еңбек қатынастарындағы негізгі құжат - еңбек шарты мен оны рәсімдеу тәртібі туралы айтты. Ал облыстық ұйымының құқықтық және кадр жұмыстары жөніндегі жетекші маманы Әлия Игенбайқызы еңбек кітапшасы мен жұмыс беруші актілерінің дұрыс рәсімделуі, еңбек кітапшасының сауатты толтырылуы жөнінде тыңдаушыларға дәріс өтіп, слайдтар арқылы тақырыптың аясын аша түсті. Құзырлы органдар мен кәсіподақ инспекторларының білім мекемелерін тексеру барысында жиі анықталатын қателіктер, кадр мамандары жіберетін кемшіліктер мен салалық еңбек заңнамасына енген өзгерістер семинар қатысушыларын қызықтыра түсті.
Семинар соңында еңбек туралы және салалық заңнаманы қолданудың бірқатар сұрақтары бойынша сұрақ-жауап сағаты өтті. Онда барлық қатысушылар өздерін толғандырған сұрақтарға жауап алып, әріптестерінің тәжірибесімен танысты. Семинар қорытындысында барлық қатысушыларға арнайы оқу курсынан өткендігі туралы сертификаттар табыс етілді.
«Еңбекші»-ақпарат
-
Фото
-
