Аумақтық ұйымдардың жаңалықтары

4 қазан күні Түркістан қаласында Түркістан облыстық адами әлеуетті дамыту басқармасы мен Қазақстандық салалық білім және ғылым қызметкерлері кәсіптік одағының Түркістан облыстық ұйымының ұйымдастыруымен «Ұстаздар күні» мен «Кәсіподақтар күні» мерекесі аталып өтті. Іс-шараға облыстағы ардагер ұстаздар, озат және үздік мұғалімдер, мектептер директорлары мен облыстың кәсіподақ активі қатысты. Ұстаздар мен кәсіподақ активін құттықтауға Түркістан облысының әкімі Шөкеев Өмірзақ Естайұлы қатысып, ұстаздарды атаулы мерекемен құттықтап, озат мұғалімдерді облыс әкімінің «Құрмет грамотасы» және «Алғыс хатымен» марапаттады. Сонымен қатар, үздік педагогтарға облыстық маслихаттың «Алғыс хаттары» тапсырылды.
Мерекеге шақырылған 200 ардагер ұстаздарға арнайы сый-сияпаттар табысталды.
«Нұр Отан» партиясы Түркістан облыстық филиалының «Құрмет грамоталарымен» білім саласында жұмыс істейтін кәсіподақ активі марапатталды.
Түркістан облыстық адами әлеуетті дамыту басқармасының басшысы Р.Қ.Жолаев және Қазақстандық салалық білім және ғылым қызметкерлері кәсіптік одағының Түркістан облыстық ұйымының төрағасы Б.С.Еркінбек бірқатар ұстаздарды «Білім және ғылым қызметкерлерінің кәсіптік одағына сіңірген еңбегі үшін» белгісімен, облыстық адами әлеуетті дамыту басқармасы және облыстық кәсіподақ комитетінің бірлескен «Құрмет грамоталарын» тапсырды.
Елбасының 2019 жылды «Жастар жылы» деп жариялауына байланысты, облыстық адами әлеуетті дамыту басқармасы және облыстық кәсіподақ комитеті бірлесіп өткізген «Үздік жас мұғалім» байқауының қорытындысы бойынша жеңімпаз деп танылған пәндер бойынша 12 жас үздік мұғалімдерге дипломдар мен бағалы сыйлықтарды Р. Жолаев пен Б.Еркінбек табыстады.
Салтанатты жиын барысында жас бүлдіршіндер мен облыстың саз мектептері мұғалімдерінің концерттік нөмірлері орындалып отырды.
Салтанатты жиын соңында, хордың орындауындағы мұғалімдер гимні болып саналатын «Ұстазым менің» әнін жиынға қатысушылар орындарынан тұрып, меркелік көңілмен қосыла шырқады.