Аумақтық ұйымдардың жаңалықтары

Ағымдағы жылдың 11-13 маусым аралығында Алматы облыстық білім және ғылым қызметкерлері кәсіподақ ұйымының ұйымдастыруымен «Туризм -2019» жарысы өтті.
Аталған шараға аудандық, қалалық филиалдар мен білім мекемелерінен 10 команда, 150-ге жуық адам қатысты.
Спорттық шараның мақсаты – ұстаздар арасында салауатты өмір салтын насихаттау, спорттық туризмді дамыту, ұжымдар арасында достықты нығайту.
Жарыстың алғашқы күнінде қатысушылар Ескелді ауданына қарасты Көкжазық ауылындағы «Балдырған» лагерінің аумағына орналасып, шатырларын тікті.
Келесі күні, «Туризм-2019» жарысының ресми ашылу салтанаты өтіп, онда облыстық білім басқармасы, облыстық туризм және облыстық кәсіподақ орталығының өкілдері қатысушыларға сәттілік тіледі.
Алматы облыстық білім және ғылым қызметкерлері кәсіподақ ұйымының төрағасы Садық Әбдіқадыров болса, соңғы үш жылда кәсіподақ мүшелері және балаларының денсаулығын нығайтуға ерекше назар аударып келе жатқанын айтып, туризм жарысында озық командаларға арнайы дайындалған сыйлықтар барын жеткізді.
Табиғат аясында өткен жарыста командалар түрлі кедергілерді бағындырып, картамен жұмыс жасап, от жағу, компас бағыттау, шатыр тігу, шатқалдарға арқанмен өрмелеп шығу, жараланған спортшыларға шұғыл медициналық көмек көрсету сияқты сындардан өтіп, шеберліктерін көрсетті.
Кеш ғұрым әр топтың жігіттері қазақ күресінен өзара белдесіп, «Кәсіподақ барысы» атаған Алакөлдік палуан Қайратұлы Олжас жеңіп алды. Белдесу сайысынан кейін спорт сүйер қауым Ескелді аудандық мәдениет үйі әншілерінің өнерін тамашалады.
Облыс көлемінде ұйымдастырылған жарыстың соңғы күнінде командалар «Аспазшылар», «Қабырға газеті», «Фотосуреттер», «Тұрмыс» сынды байқаулар бойынша бақтарын сынап, жеңімпаздарды анықтады.
Үш күнге созылған жарыста бағы мен бабы келіскен, жүзден жүйрік шыққан Текелі қаласының «Жалынды жастар» командасы І орынды иеленді. ІІ орынды Талдықорған қаласының «Жетісу қырандары», ІІІ орынды Кербұлақ ауданының «K.ЖасSTAR» командасы еншіледі. Байқаулар мен командалық есепте жүлделі орынды иеленген жеңімпаздар, Алматы облыстық білім және ғылым қызметкерлері кәсіподақ ұйымының дипломдары, ақшалай, бағалы сыйлықтарымен марапатталды.

Алматы облыстық білім және ғылым
қызметкерлері кәсіподақ ұйымының баспасөз қызметі