Аумақтық ұйымдардың жаңалықтары

Жамбыл облысы білім және ғылым қызметкерлерінің жергілікті кәсіподағының Жуалы аудандық комитетінің ұйымдастыруымен «Тәуелсіз елдің спорт сүйер ұстаздары» дәстүрлі спартакиадасы өтті. Білім қызметкерлерінің дәстүрлі VІІІ спорт додасы сап түзеген ұстаздардың Әнұранды орындауымен басталды.
Саламатты өмір салтын қалыптастыру мен насихаттауды, дене шынықтыру мен спортты дамыту мақсатында Жастар жылына орай ұйымдастырылған шараны ашқан аудан әкімінің орынбасары Әбдікерім Уркумбаев құттықтау сөз айтып, спорттың адам денсаулығана тигізер пайдасы мен халықты бұқаралық спортпен шұғылдануға баулыған іс-шараның маңыздылығына тоқталды. Аудандық мәслихат хатшысы Ерғали Тілеубеков те сөз алып, спартакиаданың сәтті өтуіне тілектестігін білдірді. Ел ағаларының адуынды тілектерінен соң ұстаздар арасында өткен «Тәуелсіз елдің ұлағатты ұстаздары» облыстық фестивалінің жеңімпазы Самал Бейбітқызы «Жаса, Қазақстан!» әнін орындап, жарысқа қатысушы әріптестеріне көтеріңкі көңіл-күй сыйлады. Спартакиаданың ашылу салтанатынан кейін командалар ойын түрлеріне қарай мектеп-мектепке бөлінді.
Ауданның білім мекемелерінің ұстаздары мен қызметкерлерінен жасақталған 17 команданың арасынан тартысты өткен ойын нәтижесінде жалпы командалық есеп бойынша І орынды орталық аймақтан №15 мектеп-лицейінің командасы жеңіп алды. ІІ орынды Қарасаз аймақтық құрама командасы, ІІІ орынды Мыңбұлақ аймақтық құрама командасы иеленді. Жеңімпаз командаларды білім қызметкерлерінің жергілікті кәсіподағының төрайымы міндетін атқарушы Аризат Мұртазаева құттықтап, арнайы дипломдармен марапаттады. Сонымен бірге ойынның жеке түрінен жүлделі орын алған ойыншылар да арнайы марапатталды. Оның ішінде ерекше атап өтер болсақ, А.Пушкин атындағы орта мектептің дене шынықтыру пәнінің мұғалімдері, спортсүйер әкесі Әбілсейіт Махатаев пен ұлы Еламан Әбілсейітұлы жарыс барысында ерекше белсенділік танытып, әріптестеріне үлгі болды. Атап айтсақ, футболдан, 100 метрге жүгіруден, эстафетадан Еламан І орынды иеленсе, әкесі Әбілсейіт кіші футболда үздік ойыншы атанды.
Осы спартакиада нәтижесінде үздік ойыншылардан жасақталған құрама команда облыстық спартакиадада аудан намысын қорғайтын болады.

Аризат БАТЫРХАНҚЫЗЫ,Филиал төрайымының м.а.
ЖУАЛЫ ауданы