Аумақтық ұйымдардың жаңалықтары

Өткен жұмада аудан әкімі Нұрымбет Аманұлы Сақтағановтың қолдауымен жастар жылы аясында мұғалімдер мәртебесін көтеру мақсатында Ұлан ауданының білім беру қызметкерлерінің кәсіподақ ұйымының төрағасы Нұрхат Садыков пен аудандық білім бөлімінің ұйымдастыруымен жас педагогтар форумы өтті.
Форум Райымжан Мәрсеков атындағы орта мектебінің жас мамандарының флешмобымен ашылды.
Жас педагогтар форумында аудан әкімінің орынбасары Нұржан Абдыкаримов, «Нұр Отан» партиясы Ұлан аудандық филиалы төрағасының орынбасары Думанай Мусин, Ұлан ауданының білім беру қызметкерлерінің кәсіподақ ұйымының төрағасы Нұрхат Садыков, Райымжан Мәрсеков атындағы орта мектептің директоры Қаршыға Бұхарбаева құттықтау сөз сөйлеп, жас мамандардың еңбектеріне табыс тіледі.
Форум барысында Шығыс Қазақстан облыстық білім және ғылым қызметкерлері кәсіподақ ұйымының төрайымының орынбасары Елена Крупко мен кәсіподақ ұйымның жастар ісі жөніндегі маманы Эльдар Майданбекұлы «Кәсіподақ деген не?» деген тақырыпта көптеген мағлұматтар берді. Өскемен қалалық Оралхан Бөкей атындағы орталық кітапхананың қызметкерлері Жанат Жиенбекова мен Гүлбаршын Абылғазинова «Бәсекеге қабілеттілік және ұстаз беделі» шеберлік -сыныбын өткізді.
«Ағаш ек, гүл ек – туған жерді түлет» дегендей жас ұстаздар Райымжан Марсеков атындағы орта мектебінің ауласына аудан әкімі Нұрымбет Сақтағанов пен бірге шырша көшеттерін отырғызды.
Бұдан соң аудан әкімі Нұрымбет Аманұлы жас педагогтармен «галстуксыз кездесу» форматында сұхбат өткізді. Кездесу барысында әркім өздерінің көкейлерінде жүрген өзекті сауалдарын қойып, ашық пікіралысты. Аудан басшысы жастардың айтқан ұсыныстарын, сауалдарын негізге ала отырып, тұщымды жауап қайтарды. Елбасымыздың алға қойған мақсаттарына қол жеткізу үшін алған білімдері мен күш-жігерлерін ауданымыздың өсіп-өркендеуі жолында жұмсауларына тілектестігін білдірді.
ШҚО білім басқармасының «Шығыс» өңірлік орталығы директорының орынбасары Асем Нускенова жас мұғалімдермен кездесу өткізіп, педагог мәртебесі туралы кеңінен тоқталып, тəжірибелі педагогтар, республикалық «Үздік педагог-2018» байқауының жеңімпаздары Өскемен қаласы әкімдігінің № 38 ағылшын тілін терендетіп оқытатын гимназияның ағылшын тілі мұғалімі Елена Кивина мен ақын докторант, «Серпер» сыйлығының иегері, «100 Жаңа есім» жобасының жеңімпазы, Қазақстан Республикасының Мәдениет саласының үздігі Ержан Жұмабеков «Мотивация, мақсат және жетістік» жөнінде ашық сұхбат өткізді.
Жас педагогтар форумы аудандық мәдениет үйінде жалғасын тапты. Бір күнге созылған форумға қорытынды жасаған аудан әкімінің орынбасары Нұржан Абдыкаримов форумның жоғары деңгейде өткендігін алға тартып, білім саласының мәртебесін көтеріп,жас ұрпаққа сапалы білім, саналы тәрбие берген Ш.Башиков атындағы орта мектептің ұстазы Мұрат Тілекті, Таврия орта мектебінің ұстазы Рустам Айтказиновті, Амангелді атындағы негізгі мектептің ұстазы Жұлдыз Кабитканованы, Райымжан Мәрсеков атындағы орта мектептің ұстазы Мадина Садуақасованы, Лут атындағы орта мектебінің ұстазы Армангүл Сыздықованы аудан әкімінің Мадақтама қағазымен марапаттап, 50 000 теңгенің сертификатын табыс етті.
Шығыс Қазақстан облыстық білім басқармасы мен Шығыс Қазақстан облыстық білім және ғылым қызметкерлері кәсіподақ ұйымының Құрмет грамотасымен және ақшалай сыйлығымен Асубұлақ орта мектебінің ұстазы Сабина Дайрбаева, Р.Мәрсеков атындағы орта мектебінің ұстазы Әділ Анарбеков, М.Ломоносов атындағы орта мектебінің ұстазы Айдана Байбосынова, С.Аманжолов атындағы орта мектебінің ұстазы Меруерт Қырықбаева, аудандық балалар музыка мектебінің ұстазы Досжан Ержанов марапатталды.
Еңбек жолдарын енді бастаған жас мамандар өздеріне көрсетілген құрметке ризашылықтарын жеткізіп, пікірлерін білдірді.
Форумда аудан әкімінің Мадақтама қағазымен марапатталып, 50000 теңге сертификатына ие болған Ш.Башиков атындағы негізгі мектептің жас маманы Мұрат Тілек өз сөзінде:
- Ұлан ауданының білім беру қызметкерлерінің кәсіподақ ұйымының төрағасы Нұрхат Тоқтарханұлының ұйымдастыруымен алғаш рет жас педагогтар форумы өткізілді. Форумда өмірлік тәжірибелері бар білікті мұғалімдер мен Қазақстан Республикасының үздік педагогтарынан тәжірибе алмасып, жас мамандар өзімізге қажетті құнды ақпараттар алдық. Аудан әкімі Нұрымбет Аманұлы да жастармен кездесіп, дұрыс бағыт-бағдар беріп, әркім өздерін толғандырып жүрген сауаладарына жауап алып, үлкен әсер алдық,- деп ағынан жарылды.
Осындай тағылымы мол шараның соңында аудандық мәдениет үйінің өнер саңлақтары концерттік бағдарламаларын ұсынды.