АТҚАРУ КОМИТЕТІНІҢ ОТЫРЫСЫ ӨТТІ
Қазақстандық салалық білім және ғылым қызметкерлері кәсіподағының Жамбыл облыстық ұйымының Атқару комитетінің 2019 жылғы алғашқы отырысы кәсіподақ төрағасы Ерұлан Мағзымбековтың төрағалығымен өтті. Мәжіліске Атқару комитетінің мүшелері, Кәсіподақ филиалдары мен тікелей бағыныстағы құрылымдық бөлімше жетекшілері, аймақтық құқықтық инспекторлар қатысты.
Кәсіподақ төрағасы күн тәртібіндегі алғашқы сұрақ - Кәсіподақтың Жамбыл облыстық ұйымындағы есеп беру-сайлау науқанының қорытындылары туралы айтып өтіп, сөз барысында жеткен жетістіктер мен науқан барысында жіберілген кемшіліктерге тоқтала отырып, жалпы өткен жылға сараптамалық есеп беріп өтті. Осыдан кейін Ерұлан Сәбенұлы 2019 жылдың жұмыс жоспарымен таныстырып, өзара талқылаудан кейін жоспарды бекіту туралы ұсыныс бірауыздан қабылданды.
Сондай-ақ, жиын барысында Қордай және Сарысу аудандары бойынша құқықтық кәсіподақтық еңбек инспекторларының сала қызметкерлері-кәсіподақ мүшелерін құқықтық қорғау жұмысын ұйымдастыру жағдайы туралы сұрақтар қаралды. Бұл сұрақ бойынша Қордай ауданындағы кәсіподақ мүшелерінің құқықтық қорғалуы туралы Бауыржан Алпысбаев пен Сарысу ауданы бойынша құқықтық еңбек инспекторы Мәулен Абдировтың есептері тыңдалды. Сондай-ақ, Атқару комитеті 2019 жылға арналған кәсіподақ активі мен белсенділерін оқыту жоспарын нақтылап, кәсіподақтың облыстық ұйымының 2019 күнтізбелік жылға іс номенклатурасын бекітті.
Жиын соңында Атқару комитеті Қаулы қабылдап, оған сәйкес құрылымдық бөлімшелердің жетекшілеріне кәсіподақтың облыстық ұйымының жұмыс жоспары негізінде өз жұмыс жоспарын әзірлеу, кәсіподақтың облыстық ұйымы мен құрылымдық бөлімшелерінің штаттық кестесін нақтылау мен сала қызметкерлері-кәсіподақ мүшелері мен олардың отбасы өкілдерін 2019 жылға арналған сауықтыру шараларының жоспарын қабылдау туралы міндеттемелер жүктелді.
Перизат БАҚЫТ
-
Фото
-
