Шығармашылықпен жұмыс жасайтын мұғалімдердің облыстық тәжірибе алаңы
2019 жылдың 02-05 қаңтар күндері Қызылорда облыстық кәсіподақ комитеті және «Өрлеу» БАҰО» АҚ филиалы Қызылорда облысы бойынша ПҚ БАИ бірлесіп облыстық шығармашыл мұғалімдердің тәжірибе алаңын ұйымдастырды. «Тәжірибе алаңы» – бүгінгі таңда озат тәжірибелі мұғалімдермен үнемі тығыз байланыста болуға, олардың қызметтік проблемалары мен шығармашылық әлеуетін дер кезінде көруге, курстық және курсаралық шаралардың нәтижелілігін байқау үшін жыл сайын кері байланыс жасауға мүмкіндік беретін ең құнды, ең маңызды жобаларының бірі.
Жиында «Өрлеу» БАҰО» АҚ филиалы Қызылорда облысы бойынша ПҚ БАИ МКДППҚЕ кафедрасының аға оқытушысы, ұйымдастыру алқасының жетекшісі Құсейнов Серік Әбсадықұлы кіріспе сөзбен ашып, 17 жылдан бері дәстүрлі түрде өткізіліп келе жатқан тәжірибе алаңының мұғалімдер үшін берер нәтижесі мол екендігіне тоқталып өтті.
Қызылорда облыстық Білім және ғылым қызметкерлерінің кәсіподақ комітеті төрайымының орынбасары Ескалиева Гүлнар Бабабекқызы «Тәжірибе алаңы» – 4 күн ішінде бірнеше бағыттағы формасы алуан түрлі шараларды өткізе отырып, әрбір ұстаздың біршама жұмыстарын қорғауға жағдай жасайтын, ірі жобалардың бірі екендігін атап, шығармашыл мұғалімдердің еңбектерін атап өтті.
Биылғы жылдың ерекшелігі жаңартылған білім беру мазмұны аясындағы іс-шаралар көптеп қамтылды. Сонымен қатар тәжірибе алаңына облыстан 80 мұғалім қатысып, оның 60% 35 жасқа дейінгі жастар болды. Ұйымдастырушылардың жоғары деңгейде үйлестіре білу әрекеттерінің нәтижесінде уақыт тапшылығына қарамастан барлық шараны өткізу мүмкіндігіне қол жеткізілді. Қатысушылардың шығармашылық еңбегін айқындайтын әрбір материал алаң жұмысы барысында өздерінің және тәуелсіз сарапшылардың тезінен өткізіліп, лайықты бағаланды, бағыт-бағдар беріліп, жетілдіру бағытындағы ұсыныстарымен толықтырылды.
Жиын соңында облыстық тәжірибе алаңы барысында төменде көрсетілген іс-шараларға белсене қатысып, үздік жұмыстары мен кәсіби шығармашылық шеберлігі үшін мұғалімдерге, тәуелсіз сарапшыларға, командаларға «Өрлеу» БАҰО АҚ филиалы Қызылорда облысы бойынша ПҚ БАИ және Қызылорда облыстық Білім және ғылым қызметкерлерінің кәсіподақ комитетінің Құрмет грамоталары, І, ІІ, ІІІ дәрежелі Дипломдар, Алғыс хаттар тапсырылды.
Г.Ескалиева
-
Фото
-
