Аумақтық ұйымдардың жаңалықтары

Білім және ғылым қызметкерлері кәсіптік одағы Талдықорған аумақтық ұйымына қарасты барлық аудандық, қалалық кәсіподақ комитеттерінде Қазақстан Республикасының Тәуелсіздік күні мерекесі жоғарғы деңгейде аталып өтуде.
Осы ретте білім және ғылым қызметкерлері Көксу аудандық кәсіподақ комитетінің жанынан құрылған жастар Кеңесі бүгін «Тәуелсіз елдің ұланымыз» атты форумын ұйымдастырды.
Шараға Қ. Жалайыри атындағы орта мектеп - гимназиясынын директоры Мұратбек Төлекенов, Балпық би ауылдық округының әкімі Қуат Күзбаев, Көксу жастары ресурстық орталығының жетекшісі Қуаныш Дүйсенбаев және кәсіподақ мүшелері қатысты.
Тәуелсіздік күніне арналған форумда аудандық кәсіподақ комитетінің төрағасы Дина Нүсіпова сөз алып, Елбасы биылғы Жолдауында «Педагог мәртебесі туралы» Заңды қабылдауды тапсырғаны барша ұстаздар қауымына қуаныш сыйлаған жеткізіп, осы жобаға ұсыныстар жинақталып жатқанын хабардар етіп, қатысушыларды айтулы мерекемен құттықтады.
Кезекті сөзді аудандық кәсіподақ комитеті жанынан құрылған жастар кеңесінің төрағасы Мирас Рахимжанов алып, жастар жылында жас педагогтардың жұмысқа деген ынтасын, жігерін нығайту үшін түрлі шаралар ұйымдастырмақ ниетте екенін айтты. Сонымен қатар, әзірленіп жатқан Заңның жобасына шығармашылық ізденіспен оқушыларын облыстық және республика деңгейіндегі пән олимпиадалары мен ғылыми жобаларға жетелеген мұғалімдерге негізгі еңбек ақыларына қосымша белгілі бір мөлшерде арнайы сыйақы төленсе деген өзінің ұсынысын жеткізді.
Форум барысында Қ. Жалайыри атындағы орта мектеп- гимназиясы директорының орынбасары Айдынгүл Нұрдәулетова Талдықорған аумақтық ұйымының Құрмет грамотасымен марапатталса, жас ұстаздар мен оқушылар патриоттық әндер шырқап, өз өнерлерін көрсетті.

Білім және ғылым қызметкерлері кәсіптік одағы
Талдықорған аумақтық ұйымының баспасөз қызметі