ТӘУЕЛСІЗ ЕЛДІҢ ҰЛАҒАТТЫ ҰСТАЗДАРЫ
Ұстаз жолы – ұлы жол. Бақыттың бастауы білімде екені бізге бұрыннан белгілі. Сондықтан ұстаздық жолды үлкен өнер жолы деп бағамдасақ, мұғалімдердің біліммен қатар, өнерде де өзіндік орындары бар екені түсінікті. Осы орайда аудандық Мәдениет үйінде ел Тәуелсіздігінің 27 жылдығына орай «Тәуелсіз елдің ұлағатты ұстаздары» атты педагогикалық ұжымдар көркемөнерпаздары шығармашылығының VII аудандық фестивалі болып өтті.
Білім саласында көркемөнерпаздық шығармашылықпен айналысатын қызметкерлерді анықтау, кәсіподақ ұйымының беделі мен шығармашылық белсенділігін көтеру, туған елге, жерге деген сүйіспеншілік пен құрметті арттыру мақсатында өткізілген фестивальға аудан әкімінің орынбасары Бақытжан Есеев, аудан ұстаздары және ұстаздық қырынан бөлек, тұла бойына білім мен өнер қатар тұнған ауданымыздағы 17 мектептен 140 мұғалім қатысты. Сондай-ақ, фестивальға Білім және ғылым қызметкерлері кәсіподағының Жамбыл облыстық ұйымының төрағасы, алқа төрағасы Ерұлан Мағзымбеков бастаған қазылар төрелік етті.
Дәстүрге айналған шаттық шалқыған кештің сахна шымылдығы Жамбыл мектеп-гимназиясы ұжымынан құрылған хордың орындауындағы А.Қоразбаевтың «Егемен Қазақстан» әнімен түріліп, осы орындауда А.Асылбековтің сөзіне жазылған Н.Еспановтың «Жаңа ғасыр - Қазақстан» әні сахнаның әрін әрмен қарай арттыра түсті. Мұнан соң балалар мен жасөспірімдер орталығының ұстазы Бектұр Оңалов Майлықожаның термесін қос ішекті қасиетті қара домбырада нақышына келтіре орындады. Сонымен қатар балалар саз мектебінің ұстаздарынан құрылған фальклорлық ансамбль Құрманғазының «Адай», Н.Тілендиевтің «Ата толғауы» күйлерін шабыттана орындап, Е.Хасанғалиевтің «Айналдым елім» әнін тамылжыта шырқады.
Мұнан соң өнер ұжымдары көркемсөз оқу, вокал, хореография, драма өнері, ансамбль, оркестр жанрлары бойынша өз өнерлерін ортаға салып, сахна төрінде салтанат құрды. Әсіресе, №1 орта мектеп директоры Нүркен Пернебаев бастаған ұстаздар қауымының «Мұқағали» атты тақырыпта қойылған драмалық көрінісі өнер сүйер қауымның көзайымына айналды. Сондай-ақ, «Бақыт құсы» биін мың бұрала билеп, көпшіліктің қошеметіне ие болған Жамбыл мектеп-гимназиясының ұстаздары алдағы уақытта облыста өтетін гала-концертке жолдама алды.
Қойылған шығармалары лед-экрандағы бейне көріністер тақырыбымен астасып жатқан тамаша кештің өнерпаз ұстаздары арнайы дипломдармен және бағалы сыйлықтармен марапатталды.
Уалихан ЖАЙЛАУ
-
Фото
-
