Ұстаз мәртебесі кәсіподақ назарында
Елбасы Нұрсұлтан Назарбаев кезекті Қазақстан халқына арнаған Жолдауы аясында шалғай елді мекендегі ұстаздар қауымымен қауышып, олардың ұсыныстары мен талаптарын жинақтап, ұстаз мәртебесін көтеріп, құқықтарын қорғауда білім беру қызметкерлерінің Шығыс Қазақстан облыстық кәсіподақ ұйымының басшысы Назгүл Базарбайқызы мен ұйымның маманы Нұрсағила Сұмағұлқызы 23 қарашада Зайсан ауданында семинар өткізді.
Семинарға жергілікті басқару органдарынан өкілдер қатысып Елбасының ұстаз мәртебесін қорғаудағы қабылданар заңға оң көзқарастарын білдірді. Зайсан ауданында өткен семинарда ауданға қарасты білім беру мекемелері басшылары, ұстаздар, бала-бақша басшылары, тәрбиешілер, бастауыш кәсіподақ ұйымының төрағалары мен төрайымдары, аудандық "Нұр Отан" партиясы филиалының төрағасының орынбасары М.Қайрақова, аудандық ішкі саясат бөлімінің басшысы З.Дүйсенбаева, аудандық білім беру қызметкерлерінің кәсіподақ ұйымының төрағасы Қ.Сайранов, облыстық "Мектеп және Қоғам" газетінің редакторы Е.Зағыпаров қатысты.
- Ұстаздар мәртебесі мен құқығын қорғауда білім беру қызметкерлерінің кәсіподақ ұйымының атқарып жатқан шаралары ауқымды. Ұстаз мәртебесін қорғаудағы қабылданар заң жүйесі біздің ұстаздарымыздың бірден-бір құқықтық қорғаны деп білеміз. Мектептен тыс, түрлі мәдени іс-шаралар мен мемлекеттік жиындарда ұстаздар қауымымен зал толтыру, мерекелік іс-шараларда жөнсіз жұмсаулар, ырықсыз баспаға күштеп жаздыру мәселелері де қабылданар заңда тайға таңба басқандай көрсетілуі керек. Жергілікті басқару органдарының соның ішінде әкімшілік басқару басшылығының ұстаздарға деген жөнсіз жүктемелері, сайлау алды үй аралап тізім жинау, т.б мәселелер тоқтатылуы қажет,-деді Облыстық білім беру қызметкерлерінің кәсіподақ ұйымының басшысы Н.Қасенова.
Семинар барысында Елбасы Н.Назарбаевтың кезекті Жолдауының "Ұстаз мәртебесі" бағытындағы жоспарлы жұмыстары түсіндірілді. Ұстаздар жалақыларының артуы мен басшылық талаптардың мәселелеріде айтылды. Сонымен қоса бала-бақша тәрбиешілерінің жалақыларының өсуі Елбасының тікелей тапсырмасы екені жеткізілді. Жаңа 2019 жылдың қаңтарынан бастап Жолдауда айтылған барлық мәселелердің шешімі табылатыны ұстаздар қауымын қуантты.
Ал, Елбасы Н.Назарбаевтың ұстаз мәртебесін қорғайтын заң қабылдаудағы үкіметке тапсырған тапсырмасы бойынша семинар барысында кеңінен талқыланып, ұсыныстар мен шағымдар тыңдалды. Алдымен облыстық білім беру қызметкерлерінің кәсіподақ ұйымының мемлекет тарапынан қабылданар ұстаз мәртебесі туралы заңға әзірленген ұсыныстары тыңдалып, ұсыныстар енгізілді.
Еркебұлан Серікұлы
-
Фото
-
