Жалағашта жалғасын тапқан көшпелі семинар
Қазақстандық салалық білім және ғылым қызметкерлері кәсіптік одағының Қызылорда облыстық ұйымы ҚБ жылдық жоспарына сәйкес 20 қараша күні Жалағаш ауданында білім беру ұйымдарының еңбек қауіпсіздігі жөніндегі техникалық инспекторлары мен іс жүргізушілеріне арналған семинар өткізді.
Семинар мақсаты: еңбекті қорғау жөніндегі техникалық инспекторлардың еңбек ұжымында қауіпсіз еңбек жағдайларын қамтамасыз ету мен бақылауды жүзеге асыру, сондай-ақ іс жүргізушілердің құжаттар толтыру барысында ҚР Еңбек кодексін және ұжымдық шарт ережелерін қолдануы бойынша түсінігін кеңейтіп, біліктілігін арттыру.
Жалағаш аудандық кәсіподақ ұйымының төрайымы Г.Аханаева «Білім мекемелерінде іс жүргізудің басты мәселелері. Арыз шағамдарды қарау тәртібі» тақырыбында баяндама жасап, білім саласына қатысты қабылданып жатқан заңдар мен жаңадан енгізілген өзгерістерге жан-жақты түсіндірме жұмыстарын жүргізді.
Облыстық кәсіподақ комитетінің құқықтық қызмет жөніндегі бас маманы Н.Утегенова «Ұжымдық шарт жұмыскерлер мүддесін қорғау мәселелеріндегі басты құжат» тақырыбында ұжымдық шарттың ережелеріне жеке жеке тоқталып, түсіндірме жұмыстарын жүргізді. Сонымен қатар жыл басынан бері білім беру ұйымдарында қоғамдық бақылау мен қабылдау кезінде анықталған кемшіліктерді мысалға келтіріп, алдағы уақытта қайталанбауын ескертті.
Еңбек ұжымында қауіпсіздік жағдайларын қамтамасыз ету, олардың жұмысын ұйымдастыру тәртібі мен техникалық инспектор жұмысының күнделігінің толтырылу тәртібін облыстық кәсіподақ комитетінің құқықтық қызмет жөніндегі маманы Е.Жұбатқанов түсіндірді.
Облыстық кәсіподақ комитетінің бас есепшісі М.Төребаева кәсіподақ мүшелерінің жазғы және қысқы демалысын ұйымдастыру жөнінде ақпарат берді.
Семинар соңы сұрақ жауаптармен жалғасын тауып, қатысушылардың көкейлерінде жүрген мәселелер талқыланды.
Семинардың екінші кезеңінде облыстық кәсіподақ комитетінің қызметкерлері Жалағаш индустриалды-аграрлық колледжінде қоғамдық қабылдау ұйымдастырып, бастауыш кәсіподақ төрағасының құжаттарына практикалық көмек көрсетті.
Қызылорда облыстық кәсіподақ комитеті
-
Фото
-
