Аумақтық ұйымдардың жаңалықтары

Елбасы Н.Назарбаевтың «Болашаққа бағдар: рухани жаңғыру» бағдарламалық мақаласы аясында өтіп «ТӘУЕЛСІЗ ЕЛДІҢ ҰЛАҒАТТЫ ҰСТАЗДАРЫ» облыстық фестивалінің Жамбыл облысы Талас ауданындағы гала-концерті Ұлбике ақын атындағы мәдениет үйінде өтті. Әбітхан Сейдахметовтың жетекшілігімен Нұрғиса Тілендиевтің «Ата толғауы» және Құрманғазының «Балбырауын» күйімен ашылған концерт тыңдарманның ғана емес қазылардың да көңілінен шықты. Келесі болып сахнада дәстүрлі әндерден композиция орындаған әншілер триосы халқымыздың мерей тұтып, мақтаныш еткен, рухани жәдігерліктері ішінде замана сүзгісінен өтіп, бүгінгі ұрпақтың еншісіне егжей-тегжейлі жеткен ән қазынасынан шашу шашты. Өнер мектебінің мұғалімі Айтбай Сырғабек Біржан салдың «Он саусақ», А.Байтұрсынов атындағы гимназия ұстазы Айжамал Дауталиева Шашубайдың «Ақ қайың» әнін, ал Ақкөл балалар өнер мектебінің мұғалімі Айғазы Жанғазин Молдабайдың «Молдабай» әнін мінсіз орындағанда залдағы жұрт көне әндердің көсіле шырқалған ырғағына тебіреніп отырды. Көркемсөз оқу номинациясында Қаратаудағы мектеп-лицейдің ұстазы Берікхан Анарбаев Алаш арысы Міржақып Дулатовтың «Алашқа» шығармасын оқыса, М.Қыстаубайұлы атындағы орта мектеп мұғалімі Әділет Шоқалақов Мұқағали Мақатаевтың Шәмілге жазған хаттарынан үзінді оқыды. Балалар өнер мектебінің ұстаздарынан құралған квартет орыстың халық әні «Карабейникиді» қазақтың қобызы мен домбырасы, баян арқылы тамаша орындап шықса, Мектеп-лицейдің ұстаздарынан құралған бишілер тобының орындаған «Қамажай» биі қазылар алқасындағы би номинациясы бойынша эксперті - ЮНЕСКО ұйымының Халықаралық би комитетінің Қазақстандағы өкілі Ольга Привалованың тарапынан жоғары бағаға ие болды. «Әнсіз өмір – мәнсіз өмір» дегендей өміріміздің мәні мен сәнін кіргізетін әншілер мен композиторлар деп айтамыз. Сол айтпақшы фестивальдің сәнін кіргізген тағы бір музыкалық нөмірді Балалар мен жасөспірімдер орталығының вокал үйірмесінің педагогы Гүлфат Қалдыбекова орындады. Гүлфаттың орындауындағы Бәкір Тәжібаевтың сөзіне жазылған Сейдолла Бәйтерековтың «Әлия» әні әннің төресі екендігін тағы бір дәлелдей түсті. Хор жанры бойынша аудан ұстаздары М.Ниязбековтың «Туған ел» және И.Нүсіпбаевтың «Жол жыры» әндерін орындады. Хор концертмейстері Әлия Рахманбердиева болса, Алтынай Дуанбекова дирижерлық жасады. Мәдениет үйінің сахнасын бір жарым сағат ән мен күйге бөлеп, халқымыздың ән қазынасын құс қанатындай әуелетіп, көрерменді таза леппен тыныстатқан концерт А.Дәулетбеков атындағы орта мектептің ұстазы Әділет Әлменнің орындауындағы «Көк тудың желбірегені» әнімен тамамдалды. Қазылар алқасы ақылдаса келе желтоқсан айында өтетін облыстық гала-концертке дәстүрлі әндерден композиция орындаған әншілер мен көркемсөз оқыған шешендерді іріктеп алды.

Перизат БАҚЫТ