Аумақтық ұйымдардың жаңалықтары

Елбасы Нұрсұлтан Назарбаевтың «Болашаққа бағдар: рухани жаңғыру» бағдарламалық мақаласының аясында өтіп жатқан көркемөнерпаздар шығармашылығының VII Жамбыл облыстық фестивалі аймақтағы іргелі жоғары оқу орындарының бірі – М.Х.Дулати атындағы ТарМУ-де өтті. Дәстүрлі түрде екі жылда бір рет өтетін ұстаздардың өнер фестиваліне Кәсіподақ төрағасы Ерұлан Мағзымбеков бастаған қазылар алқасы және профессор-оқытушылар құрамы қатысты.
Концерттік бағдарлама шымылдығы Н.Тілендиевтің «Құстар әнімен» ашылды. Аталмыш шығарманы университеттің профессор-оқытушылар құрамы мен қызметкерлерінен құралған хор мен хор солистері - «Ақпараттық жүйелер» кафедрасының аға оқытушысы Арсени Бапанов пен «Машина жасау және механика» кафедрасының оқытушысы Нұрила Сапарова орындады. Фестиваль барысында «Дулати» жастар театрының режиссеры Нұрғиса Зұлпықаров Мағжан Жұмабаевтың «Жәмилә» шығармасынан монолог оқыса, «Ақпараттық жүйелер» кафедрасының аға оқытушысы Арсени Бапанов пен «Қаржы-экономикалық бөлімнің» бухгалтері Талғат Қаңлыбаев қазақ эстрада әндерінен попурри орындады.
Фестиваль шартының бір номинациясы ретінде «Гуманитарлық-әлеуметтік ғылымдар» факультетінің оқытушы-қызметкерлері Қуандық Шаңғытбаевтың «Беу, қыздар-ай» комедиясынан үзінді сахналады. «Мәдениет және өнер» кафедрасының аға оқытушысы Шолпан Айтибаеваның режиссерлығымен әр салада қызмет жасайтын көркемөнерпаздардың күшімен қойылған спектакльді көрермендер жылы қабылдады. Ал «Мәдениет және өнер» кафедрасының аға оқытушысы Зульфия Ахметшинаның дайындаған қазақ биі «Қара жорға» мен флешмобы, Арай Бүрлібаева жетекшілік еткен шығармашылық дамыту орталығының бишілер тобының орындауындағы «Шашу» қазақ биі және университеттің лаборатория меңгерушісі Бекжан Баешов дайындаған «Лезгинка» кавказ билері көрермендер ғана емес, қазылардың да көңілінен шықты.
«Химия және химиялық технологиялар» кафедрасының аға оқытушысы Саят Мамешованың орындауындағы Ә.Тінәлінің «Әке» әні, «Мәдениет және өнер» кафедрасының аға оқытушысы Заман Бегімбеттің орындауындағы «Жестокая любовь» әндері тыңдармандардың құлақ құрышын қандырды. Сонымен бірге, әкімшілік-шаруашылық бөлімінің вахтері Ботагөз Ізбасарова орындағын Қытайдың «Мәңгілік махаббат» халық әні қазылар алқасынан лайықты бағасын алды. Ерекше оригиналдық жанр көрсетуде студенттік телестудияның дыбыс режиссеры Әділбек Қарабеков бірнеше сиқыр көрсетіп, залда отырған әріптестерін таңқалдырды.
Фестивальға атсалысқан барлық университет оқытушылары мен қызметкерлеріне алғыс айтқан университет ректоры Махметғали Сарыбеков қатысушыларды Алғыс хатпен марапаттаса, оқу орнының кәсіподақ комитетінің төрағасы Берік Хусайынов бағалы сыйлықтармен марапаттады.

Перизат БАҚЫТ