Сәтті семинар өтті
26 қазанда «Қазақстандық салалық білім және ғылым қызметкерлері кәсіптік одағының Атырау облыстық кәсіподақ ұйымы» қоғамдық бірлестігінде филиал төрағаларының, жұмыс берушілердің өкілдері мен аппарат қызметкерлерінің қатысуымен әлеуметтік әріптестік тараптарын еңбек заңнамасына оқыту семинары болып өтті.
Жиынды «Қазақстандық салалық білім және ғылым қызметкерлері кәсіптік одағының Атырау облыстық кәсіподақ ұйымы» қоғамдық бірлестігі төрағасы Қ.Сүндетұлы ашып: «Құрметті семинар жұмысына қатысушы қонақтар, кәсіподақ белсенділері! Әлеуметтік әріптестік тараптарын еңбек заңнамасына оқыту семинар жұмысын жалғастырамыз. Қаңтар айынан бастап тұрақты семинарлар өтіп жатыр, қыркүйек айында Жылыой ауданында көшпелі семинар отті, осы семинарларда көп мәселе айтылды. «Қазақстандық салалық білім және ғылым қызметкерлері кәсіптік одағының Атырау облыстық кәсіподақ ұйымы» ҚБ – гі Жарғысының 3.2.11 тармағына сәйкес кәсіподақтың облыстық ұйымының негізгі міндеті кәсiподақ мүшелері арасында олардың құқықтық, оның ішінде Қазақстан Республикасының еңбек заңнамасының негіздері бойынша сауаттылығын арттыру, еңбек дауларында келіссөздер жүргізе алуды дамыту жөнінде түсіндіру жұмысын жүргізуге міндетті. Сонымен қатар, ҚР Еңбек кодексі 159 бабы 8 тармағына сәйкес келісу комиссиясының тараптары келісу комиссиясының мүшелерін Қазақстан Республикасы еңбек заңнамасының негіздеріне, келіссөздер жүргізу машығын дамытуға және еңбек дауларында консенсусқа жетуге жыл сайын оқытуды жүргізуге міндетті. Бүгінгі семинарда еңбек қауіпсіздігі мен еңбекті қорғау, еңбек қатынастары жөніндегі мәселелер қаралатын болады. Семинарға баяндама жасау үшін «Атырау облысы мемлекеттік еңбек инспекция басқармасы» ММ-нің мамандары шақыртылып отыр» - деп, барлық қатысушыларды ашық пікір алмасып, көкейлеріндегң \сан сұраққа жауап алуға шақырды.
Алдымен «Білім беру орындарының еңбек заңнамасын қолдануы туралы» баяндама жасау үшін сөз «Атырау облысы мемлекеттік еңбек инспекция басқармасы» мемлекеттік мекемесі Еңбек қатынастары бөлімінің бас маманы Гүлдана Мұхановаға беріліп, одан әрі «Атырау облысы мемлекеттік еңбек инспекция басқармасы» мемлекеттік мекемесі Еңбек қауіпсіздігі бөлімінің бас маманы Жанесенов Сырбай «Еңбек қауіпсіздігі және еңбекті қорғау жөніндегі жұмыс берушінің міндеті туралы» баяндама жасады. Арнайы мамандардың еңбек қатынастары турасындағы тұшымды баяндамаларынан соң ашық пікір алмасу жүрді. Келген қатысушылар ашық түрде сұрақтарын қойып, оған мардымды жауап ала алды.
Мұндай семинарлар алдағы уақытта да өз мәнін жоймай, жалғасын таба беретіні сөзсіз.
Орынгүл МАХМУДОВА,
Атырау облысы
-
Фото
-
