Аумақтық ұйымдардың жаңалықтары

Бүгін білім және ғылым қызметкерлері кәсіптік одағы Талдықорған аумақтық ұйымына қарасты Көксу аудандық кәсіподақ комитеті есеп беру-сайлау конференциясын өткізді.
Оған Талдықорған аумақтық ұйымының төрағасы Садық Әбдіқадыров, Көксу аудандық білім бөлімінің басшысы Тілеумұрат Сейтнязов және 63 делегат қатысты.
Маңызды жиын барысында аудандық кәсіподақ комитетінің төрағасы Дина Нүсіпова білім ордаларында Елбасының Жолдауы жан-жақты талқыланып, ұстаздар қауымының қолдауына ие болғанын жеткізіп, баяндамасын кәсіподақтық жұмысымен сабақтастырды.
«Комитет құрамында 44 бастауыш кәсіподақ ұйымы, 2225 мүшесі бар. Есеп беру кезеңінде 4 бастауыш ұйымы қосылып, мүшелер саны 85 адаммен толықты. Комитет өз жұмыс жоспарын бір жылға жасап, жоспарға сәйкес комитеттің, атқару комитетінің отырыстары, кәсіподақ белсенділерімен кездесулер ұйымдастырылып, тексеру комиссияларының есептері уақытылы тыңдалды», -деді өз сөзінде ұйым басшысы.
Сонымен қатар, тексеру комиссиясының төрағасы Н.Химич аудандық комитеттің бастамасымен бес жылға жуық уақыт ішінде шипажайларда 227 кәсіподақ мүшесі,186 бала демалғанын және мәдени-көпшілік шаралар тұрақты өткізілгенін айтып, оған жұмсалған қаржының есебін берді.
Белсенді кәсіподақ мүшелері жарыссөзге шығып, комитет жұмысына және тексеру комиссиясының есебіне қанағаттанарлық деген баға берді.
Талдықорған аумақтық ұйымының төрағасы Садық Әбдіқадыров белсенді комитеттің жұмысына ризашылығын білдіріп, білім және ғылым қызметкерлері Көксу аудандық кәсіподақ комитетінің төрағасы лауазымына Нүсіпова Дина Шаяхметқызының кандидатурасын ұсынды. Конференция делегаттары дауыс беру арқылы алдағы бес жыл мерзіміне төраға ретінде Дина Шаяхметқызын сайлап, Талдықорған аумақтық ұйымының Конференциясына баратын делегаттар тізімін нақтылады.
Шара соңында Қазақстан Республикасы білім және ғылым министрлігінің Құрмет грамотасымен Алтынай Есжанова және қоғамдық жұмыстарда белсенділік көрсеткен Шара Базилова, Фарида Абдраймова, Бижан Андызбаевалар Талдықорған аумақтық ұйымының Құрмет грамотасымен марапатталды.

Білім және ғылым қызметкерлері кәсіптік одағы
Талдықорған аумақтық ұйымының баспасөз қызметі