ТАРАЗДЫҚ ҰСТАЗДАР ҰЛЫҚТАЛДЫ
Білім күні қарсаңында Тараз қаласында ашылған №3 мектеп-лицейдің мәжіліс залында ұстаздар күні мерекесіне арналған салтанатты шара өтті. Шараға Тараз қаласының әкімі Ғалымжан Әбдірайымов, қалалық мәслихаттың хатшысы Батырбек Құлекеев, Қазақстандық салалық білім және ғылым қызметкерлері кәсіподағының Жамбыл облыстық ұйымының төрағасы Ерұлан Мағзымбеков пен Білім және ғылым саласындағы бақылау комитетінің облыстық департаментінің басшысы Дамеш Ускембаева, қала ұстаздары мен сала ардагерлері қатысты.
Мектеп оқушыларының концерттік бағдарламасымен ашылған шарада Тараз қаласының әкімі алғашқы құттықтау сөз сөйлеп, ұстаздарды мерейлі мерекелерімен құттықтады.
- Мұғалім ең ізгі әрі қиыншылығы мол, жауапкершілігі жоғары мамандық. Қаладағы 110 білім беру ұйымдарындағы 70 717 оқушы мен 18 803 тәрбиеленушіге 8540 ұстаз тәлім-тәрбие беруде. Ұстазға қойылар талап та, міндет те күннен күнге күшейіп келеді. Соған қарамастан оқушылар да, ұстаздар да республика көлемінде үздік көрсеткіштер көрсетіп жүр. Құрметті ұстаздар! Кәсіби мерекелеріңіздің қарсаңында еңбектеріңізге табыс тілеймін! Шәкірттеріңізбен өткен әрбір күн сіздерге тек қуаныш сыйласын. Отбасыларыңыз бақыт пен құт-берекеге толып, отбасыларыңызда сыйластық пен сүйіспеншілік орнасын. Дендеріңіз сау, көңілдеріңіз жас әрі шуақты болсын! – деді шаһар басшысы өз сөзінде.
Мерекелік шара барысында Тараз қаласының үздік ұстаздары ҚР білім және ғылым министрінің, облыс әкімінің құрмет грамоталарымен, «Қазақстан Республикасының білім беру ісінің құрметті қызметкері» және Ы.Алтынсарин төсбелгілерімен, Тараз қаласы әкімінің және Қазақстандық салалық білім және ғылым қызметкерлері кәсіподағының құрмет грамотасы мен төсбелгілерімен марапатталды. Барлық марапат иелеріне Кәсіподақтың Тараз қалалық комитетінің атынан бағалы сыйлықтар табысталды. Сондай-ақ, шара барысында қаланың 10 ұстазы «Озат педагог» номинациясы бойынша марапатталып, 100 000 теңгелік сертификатқа ие болды.
Шара соңы мерекелік дастархан мен қала мектептерінің жас өнерпаздарының концертіне ұласты.
Перизат БАҚЫТ
-
Фото
-
