ЕҢБЕК ЕТКЕН – МҰРАТҚА ЖЕТКЕН
Міне, осындай тақырыпта шаһар орталығындағы Құрманғазы атындағы мәдениет үйінде «Атырау облысы кәсіподақтар орталығы» аумақтық кәсіподақтар бірлестігі мен бірнеше салалық кәсіптік одақтар ұйымдарының бірлескен шарасы өтті. Шараның мақсаты – Қазақстан Республикасының Президенті Н.Ә. Назарбаевтың 2013 жылғы 22 қарашадағы № 698 Жарлығымен елімізде белгіленген «Еңбек күні» мерекесін лайықты атап өту болатын. Бұл мерекеге аймақтың әлеуметтік-экономикалық және мәдениетінің дамуында ерекше қолтаңбалары бар қарапайым еңбек адамдарымен қатар, кәсіподақ қозғалысының белсенді ардагерлері де шақырылды. Халқымызда «Еңбек түбі – зейнет» деген аталы сөз бар. Сондықтан еңбектің берекелі жемісін көру – әр адамның асыл мұраты. Салтанатты жиынға қатысқан Атырау облысы әкімінің бірінші орынбасары Шапкенов Серік Жамбылұлы құттықтау сөз сөйлеп, өңір экономикасының дамуына сүбелі үлес қосып жүрген бір топ еңбек озаттарын облыс әкімінің Алғыс хатымен марапаттады. Олардың арасында «қара алтын» өндірген мұнайшы-оператордан бастап төрт түлік өсірген малшы, техника тізгіндеген жүргізуші, адам жанын күзеткен дәрігерден бастап кіші медбикеге дейін, кітапханашы мен журналистер де бар болатын.
Бұл күнгі құрметтен аз ғана еңбек ақыны місе тұтқан бюджеттік мекемелердің техникалық қызметкерлер санатына қосылатын тазалықшы, аула сыпырушы, күзетшілер мен жылу мен суға жауапты шеберлеріде тыс қалмады. «Қазақстандық салалық білім және ғылым қызметкерлері кәсіптік одағының Атырау облыстық ұйымы» қоғамдық бірлестігінің төрағасы Қ.Сүндетұлы облыста білім беретін мекемелердің 10 қызметкеріне ақшалай сыйлық табыстады. Дәл осындай құрметті басқа да салалық кәсіподақтар ұйымының жетекшілері өз мүшелеріне көрсете білді.
Еңбек адамдарының қоғамдағы мәртебесін арттыруға септігін тигізген аталмыш шараның жастарға тигізер пайдасы орасан зор. Осы тұста салтанатты жиынға кәсіптік-техникалық колледжілер оқушыларының шақырылуы ойластырылған іс болды. «Еңбек күні» мерекесіне бірнеше республикалық БАҚ өкілдері шақырылып, нәтижесінде оның жариялылығы жан-жақты көрініс тапты.
Мереке соңы өнер майталмандарының концертіне ұласты
