Шипалы «Меркі»
«Ел болам десең, бесігіңді түзе» дейді халық даналығы, сондықтан өркениетті мемлекеттер қатарына қосылу бізден білімді ұрпақ тәрбиелеуді талап етеді. Шын мәнінде, әрбір адамзат баласының өмір бойы жиған ілім-білімі мектеп қабырғасынан бастау алатыны анық. Ұстаздық – ұлы мамандық, олай болса, бойындағы бар білім мен өнегесін ел келешегі – жас ұрпақ тәрбиесіне арнаған, осы жолда қандай қиындықтар кездессе де мойымай жеңе білген ұстаз қауымының еңбегі елеусіз қалмақ емес. Ұстаздардың еңбегін бағалауда, олардың еңбекке деген құлшынысын арттыруда кәсіподақ мүшелерінің еңбек демалысын ұйымдастыру бір жолға қойылған. Біздің еңбегімізді бағалаған білім және ғылым қызметкерлерінің кәсіподақ ұйымына алғысымыз шексіз. Бұл ретте біздің облыстық кәсіподақ ұйымының үлесін атап өтпеске болмайды. Кәсіподақ мүшелері санаторлық-курорттық мекемелерде дем алуға мүмкіндік алып, жазғы каникулда облыс бойынша елуден астам ұстаз «Меркі» шипажайында демалып, керемет әсермен оралдық. Алатаудың етегіне қоныс тепкен Меркі – елімізге көрікті, ғажап табиғаты, саф ауасы, мәуелі бақшасымен танылған өлке. Аталған шипажайдың іргетасы 1981 жылы ресми түрде ашылып, көп ұзамай байтақ Қазақстанға кеңінен танылды. Бұл демалыс орнының нағыз шипасы минералды Радон суының емдік қасиетінде жатыр. Радон суы переферикалық жәнеорталық жүйке жүйесіне,жүрек қантамырларыауруларына, гинекологиялық және экзема, псориаз, нейродермит, аллергиялық дерматит секілді тері ауруларын, артрит, полиартрит,остеохондроз, радикулит сынды сүйек, буын сырқаттарын емдей алады. Сонымен қатар емделушілерді дене шынықтыру жаттығуларымен шынықтырып, сүйектер мен буындардың қатаюына септігін тигізеді. Нәтижесінде емнің 90 пайызы сәтті шығады. Таза ауа мен қимыл-қозғалыс жаттығулары адамның психолигиялық сезімталдығын тұрақтандырып, жүйке жүйесінің тыныштануына әсер етеді. Санаторий көл үстінен 750 метр қашықтықта орналасқан. Кешенге дейін әдейілеп салынған тасжолдан жүріп өткен демалушылар мұндай биіктікке көтерілгенін байқамай дақалады. Меркесанаториі Қырғыз-Алатау шатқалында аудан орталығынан 12 шақырым жерде тұр. Шатқалдың астынан асау өзен ағып жатыр. Мұндай тамаша шипасы мол жерлер еліміздің біраз аймағында бар. Қазақстандық салалық білім және ғылым қызметкерлері кәсіптік одағының Ақтөбе облыстық ұйымына бізге осындай жақсы мүмкіндік бергеніне алғыс айтамыз.
Ақтөбе облысы, Ойыл ауданы,
Саға мектеп-балабақшасының
орыс тілі мен әдебиеті пәнінің мұғалімі А.Амирова
