ШЫҒАРМАШЫЛ ҰСТАЗДАР ҚОЛДАУҒА ИЕ
«Жолдау жолымен – білім биігіне» тақырыбында үстіміздегі жылы аудандық білім бөлімінің қолдауымен және білім қызметкерлері аудандық кәсіподақ комитетінің ұйымдастыруымен өткен байқауда №210 Оспан Әбілпаттаев атындағы орта мектептің «Яксарт» құрамасы бас жүлде иеленген болатын. Байқауда үздік өнер көрсетіп, жарыс жеңімпазы атанған ұстаздарға облыстық жарысқа қатысуға және «Қамбаш» демалыс аймағында демалуға жолдама берілген еді. Жақында «Яксарт» құрамасының мүшелері «Қамбаш» демалыс аймағында болып, үш күн демалып қайтты.
Елбасы Жолдауында білім саласы бойынша жүзеге асырылатын ауқымды міндеттер қамтылғаны анық. Жолдаудан туындаған мақсат-міндеттерді сапалы іске асыру бағытында ұстаздар қауымына жүктелетін жауапкершілік зор. Міне, осы мақсатта №210 Оспан Әбілпаттаев атындағы орта мектептің шығармашыл ұстаздары «Жолдау жолымен – білім биігіне» атты аудандық байқауға тыңғылықты дайындалып, аудандағы 17 мектеп қатысқан білім бәсекесінде жеңімпаз атанды. Білікті мамандардан құрылған қазылар алқасының жоғары бағасына ие болды. Бұл жаңа форматта жұмыс жасап жатқан іргелі білім ордасының жарқын жетістігі.
Аудандық байқауда топ жарған орта мектептің білікті ұстаздары облыстық жарыста да абырой тұғырынан көрінді. Ал, Сыр туризмінің төрі саналатын «Қамбаш» демалыс аймағындағы демалыс барысында «Яксарт» құрамасының мүшелері түрлі семинар-тренингтер, дөңгелек үстелдер, спорттық жарыстар ұйымдастырып, демалысқа арналған үш күнді тиімді өткізді. Ұстаздар бала тәрбиесіндегі басым бағыттар мен білім саласындағы жаңалықтар туралы пікір алмасып, алдағы оқу жылында атқарылатын жұмыстарды саралады. Аудандық кәсіподақ комитетінің қолдауымен өтетін байқауларға алдағы уақытта да жастардың белсене қатысу керектігі жөнінде өз ойларын ортаға салды.
Жалпы, жаһандану заманында бәсекеге қабілетті болудың негізгі көрсеткіші – білім деңгейімен өлшенері хақ. Сол себепті, әрбір ұстаз білім саласына бағытталып жатқан барлық мүмкіндікті пайдаланып, шығармашылықпен айналысуы тиіс. Ал, шығармашылықпен айналысып, жақсы нәтижеге қол жеткізген ұстаздарды қолдау білім және ғылым қызметкерлері кәсіподағының облыстық комитетінің тарапынан әрдайым көрсетіліп келеді.
Жазира ОСПАНОВА,
№210 О.Әбілпаттаев атындағы
орта мектебінің мұғалімі
-
Фото
-
