АҚСҮЙЕКТЕРДІҢ КЛАССИКАЛЫҚ ҚҰШТАРЛЫҒЫ
Кәсіподақтардың төл мерекесі қарсаңында Жамбыл облысы кәсіподақтар орталығы өңірдің салалық кәсіподақ ұйымдары мүшелерінің арасында бильярд спортынан I облыстық байқау өткізді. Байқауға барлық салалық кәсіподақ ұйымдарынан 19 үміткер қатысып, 8 сағатқа созылған тартысты жарыста облыстық кәсіподақ ұйымдары мүшелерінің арасынан үздіктердің үздігін анықтады.
Әр салалық кәсіподақ ұйымынан екі ойыншының қатысқанын ескере отырып ұйымдастырушылар алқасы алғашқы айналымда-ақ бір саланың өкілі өзара кездесіп қалмас үшін арнайы кесте құрып, қатысушылар жеребе бойынша өз қарсыластарын анықтады. Тартысты өткен ойында жүлделі І орынды «Казфосфат» ЖШС Жаңа Жамбыл фосфор зауытының кәсіподақ ұйымының мүшесі Әбдірахман Әлмұханов жеңіп алса, ІІ орынды да осы мекеменің өкілі Марат Базарбаев иеленді. Ал жүлделі ІІІ орынды Қазақстандық салалық білім және ғылым қызметкерлері кәсіподағының Жамбыл облыстық ұйымы «Тараз-Профсоюз-Турист» ЖШС-нің директоры Жангелді Қойбағаров еншіледі. Жеңіске құштарлық танытып, ерекше ойын өрнегін көрсеткен «АК Алтыналмас» АҚ-ның Ақбақай филиалы қызметкерлерінің «Бәйтерек» кәсіподақ ұйымының мүшесі Нұрғали Қыялов ІV орынды иеленді. Жеңімпаздарға ұйымдастырушылар атынан Алғыс хаттар мен қаржылай марапаттаулар жасалды.
Перизат БАҚЫТ
-
Фото
-
