МЕМЛЕКЕТІМІЗДІҢ БАЙЛЫҒЫ – ОЛ ЕҢБЕК АДАМЫ
Көпшілік кәсіподақ қызметін мерекелік іс-шараларды ұйымдастырушы деп қана түсінеді. Алайда, мұндай шаралар кәсіподақ жұмысының бір ғана бөлігі. Негізінен кәсіподақ әр жұмысшының еңбегін қорғаушы, бағалаушы, қызығушылығын жақтаушы, қолдаушы, еңбек дауларын шешуші роль атқарады.
Осы орайда, мереке қарсаңында Кәсіподақтың Жамбыл облыстық ұйымы Байзақ аудандық комитеті К.Әзірбаев атындағы балалар саз мектебінің мәжіліс залында салтанатты шара өткізді. Бастауыш кәсіподақ ұйымының төрағалары, әлеуметтік әріптестердің және кәсіподақ ардагерлерінің қатысуымен өткен жиын комитет төрағасы Елнұрбек Ермековтың құттықтау сөзімен ашылды.
– Мемлекетіміздің байлығы – ол еңбек адамы. Бұл мереке кәсіподақ мүшелерінің ғана емес, бәрінен бұрын еңбек адамының мерекесі. Мерекенің негізгі мақсаты – еңбек адамының құқықтарын қорғаудағы кәсіподақ бірлігін, еңбеккер мәртебесін көтерудегі жаңа бастамаларды насихаттау. Осы ретте, жұмысшы мен жұмыс берушінің арасындағы мәселелерді дер кезінде шешіп, барлық тараппен тығыз ынтымақтастықта болуда кәсіподақтың маңызы зор, – Елнұрбек Сайланбекұлы осы салада еңбек етіп жүрген бірқатар қызметкерлерді салалық кәсіподақтың облыстық, республикалық ұйымының алғыс хаттарымен марапаттады.
Мерекелік шара соңы аудан өнерпаздарының концерттік бағдарламасымен жалғасты.
Перизат БАҚЫТ
-
Фото
-
