Талдықорғанда аумақтық кәсіподақ ұйымының активі өтті
4 маусым күні білім және ғылым қызметкерлері кәсіподағы Талдықорған аумақтық ұйымының активі өтті. Актив жұмысына Қазақстандық салалық білім және ғылым қызметкерлері кәсіптік одағының төрайымы Амантаева Майра Тұрғанқызы, аумақтық кәсіподақтар бірлестігінің төрағасы Қыдырманов Әсет Серікқалиұлы, облыстық білім басқармасы басшысының орынбасары Исағұлова Гүлсара Тастандықызы, комитет мүшелері қатысты.
Талдықорған аумақтық кәсіподақ ұйымының төрағасы Садық Әбдіқадыров қоғамдық бірлестіктің атқарып жатқан жұмысына тоқталып, алға қойған мақсат – міндеттерді айқындап берді.
Алқалы жиын барысында сөз алған Қазақстандық салалық білім және ғылым қызметкерлері кәсіптік одағының төрайымы Майра Амантаева республика жаңалықтарымен бөлісті.
«Қазіргі таңда кәсіподақтар қозғалысы жаңару үрдісіне бет бұрды. Алдымызда еңбек адамының әлеуметтік статусын көтеру, өмір сүру сапасын жақсарту, жастар арасында еңбек рөлін насихаттау сияқты үлкен жұмыстар тұр», - деді өз сөзінде Майра Тұрғанқызы.
Актив барысында Қазақстандық салалық білім және ғылым қызметкерлері кәсіптік одағының төрайымы М.Амантаева білім және ғылым саласы қызметкерлерінің еңбек және әлеуметтік құқықтарын қорғауда белсенділік танытып, кәсіподақ саласының дамуына қосқан зор үлесі үшін Панфилов аудандық кәсіподақ комитетінің төрағасы Тұрлыбеков Мақытбек Әділұлына, Талдықорған қаласындағы №4 орта мектептің директоры Оңғаров Алматай Ерметайұлына алғысын айтып, «Білім және ғылым қызметкерлері кәсіподағына сіңірген еңбегі үшін» төсбелгілерін тапсырды.
Соңында кәсіподақ белсенділері ынтымағы мен бірлігі жарасқан елдің символына және Талдықорған қаласының сәніне айналған 92 метрлік мемлекеттік тудың қасында Қазақстан Республикасының мемлекеттік рәміздеріне құрмет көрсетіп, естелік суретке түсті.
Білім және ғылым
қызметкерлері кәсіптік одағы
Талдықорған аумақтық ұйымының
баспасөз қызметі
-
Фото
-
