Жаркентте зейнеткерлікке шығарып салу кеші өтті
Білім және ғылым қызметкерлері кәсіподағы Талдықорған аумақтық ұймына қарасты Панфилов аудандық комитетінің желілік кестесіне сәйкес А.Розыбакиев атындағы орта мектебінде «Еңбегі еленген ұстаздар» атты кеш өтті.
Ұстаздарды зейнеткерлік демалысқа шығарып салу кешінде орыс тілі мен әдебиеті пәнінің мұғалімі Алтын Өмірбаеваны, математика пәнінің мұғалімі Сара Нүсіпованы, бастауыш сынып мұғалімі Жұмагүл Жикееваны, техникалық қызметкер Қожахмет Жолдасбаевты әріптестері, оқушылар мен туған-туыстары қошеметпен қарсы алып, гүл шоқтарын табыс етті.
Алғашқы құттықтау сөзді білім және ғылым қызметкерлері Панфилов аудандық кәсіподақ комитетінің төрағасы М.Тұрлыбеков алып, кеш иелеріне ақжарма тілектерін білдірді. «Адамды адам еткен – еңбек» демекші, адал еңбек пен төккен тердің арқасында зейнет жасына жетіп отырған ұстаздардың өмір жолы барлығымызға үлгі. Еткен еңбектің еленгені кімге де болса қуаныш, көңілге үлкен медет емес пе?!», -деді өз сөзінде Мақытбек Әділұлы.
Осыдан кейін жүргізушілер кеш иелерінің өмірбаяндарымен таныстырып, сахнада олардың өмірінің әрбір белестерінен сыр шертетін фотосуреттерден дайындалған слайдтар көрсетілді. Ал мектеп оқушылары өлең жолдарын оқыса, әріптестері, кәсіподақ ұйымының төрағасы, туған-туыстары сыйлықтарын тапсырды.
Зейнеткерлікке шығып отырған ұстаздар ұйымдастырушыларға, аудандық және бастауыш кәсіподақ комитетіне, мектеп әкімшілігіне, әріптестері мен оқушыларына шынайы ризашылықтарын білдірді.
ЖАНСАЯ КЕНЖЕБЕК,Панфилов аудандық кәсіподақ комитетінің маманы
-
Фото
-
