Аумақтық ұйымдардың жаңалықтары

Таяуда Жамбыл политехникалық жоғары колледжінің мәжіліс залында Жамбыл облыстық Қоғамдық кеңесінің ұйымдастыруымен «Қазақстан Республикасының баршаға ортақ тегін кәсіптік-техникалық білім беру» бағдарламасының Жамбыл облысында орындалу барысына арналған қоғамдық тыңдау болып өтті. Қоғамдық тыңдауға Жамбыл облысы аудандары әкімдерінің аталған салаға жауапты орынбасарлары, облыстық кәсіпкерлер палатасының өкілдері, білім басқармаларының басшылары, колледж директорлары, оқытушылары, қалалық, аудандық Қоғамдық кеңестердің төрағалары, жұмыс берушілер мен кәсіподақ ұйымының және БАҚ өкілдері қатысты.
Аталған Қоғамдық тыңдау барысында облысымыздағы 49 жалпыға бірдей тегін кәсіптік-техникалық білім беретін оқу орындарының осыған дейін жеткен жетістіктері сөз болып, бүгінгі күні орын алып отырған кемшіліктері бойынша алда тұрған міндеттерінің жай-күйі талқыға түсті. Тыңдауға қатысушылар ортақ мәселе төңірегінде кеңесіп, өзара тәжірибе алмасты. Осыған байланысты басқосудағы негізгі баяндаманы облыс әкімдігі білім басқармасы басшысының орынбасары Талғат Жамалов жасаса, қосымша баяндаманы облыстық Қоғамдық кеңесінің әлеуметтік-мәдени салалар және қоғамдық, үкіметтік емес ұйымдармен байланыс мәселелері жөніндегі комиссия төрайымы Гүлсін Орынбаева мен облыс әкімдігі жұмыспен қамтуды үйлестіру және әлеуметтік бағдарламалар басқармасы басшысының орынбасары Сейдахмет Сейітбеков жасады. Бұлардан соң жарыссөзге Жамбыл политехникалық жоғары колледжінің директоры Жанна Орынбаева, облыстық кәсіпкерлер палатасының директоры Мәріпбек Шәкербек, қазіргі заманғы гуманитарлық-техникалық колледжінің директоры Фарида Нақыш және ішкі аудит қызметінің бас маманы-мемлекеттік аудитор Медет Дәрібаев шығып, күн тәртібіндегі мәселеге қатысты өз ойларын ортаға салды.
Жиынды қоғамдық тыңдау басқосуының модераторы - Жамбыл облыстық Қоғамдық кеңесінің төрағасы Жандар Кәрібайұлы қорытты. Ол қорытынды сөзінде «Қазақстан Республикасының нәтижелі жұмыспен қамту және жаппай кәсіпкерлікті дамыту бағдарламасы аясында тегін кәсіптік-техникалық білім беру жобасының Жамбыл облысындағы орындалу барысы туралы» Қоғамдық тыңдаудың Ұсынымдары кезекті зерделеу жұмыстарынан соң қабылданып, жергілікті атқарушы биліктегілердің орындауына міндеттелетін жүктеме ретінде жолданатындығын жеткізді.

Перизат БАҚЫТ