СПОРТТЫ СЕРІК ЕТКЕН ҰЛАҒАТТЫ ҰСТАЗ
Ұстаз атана білу, оны қадір тұту, қастерлеу, арындай таза ұстау — әр мұғалімнің борышы. Ол — өз кәсібін, өз пәнін, барлық шәкіртін, мектебін шексіз сүйетін адам. Осы іске деген қызығушылық пен сүйіспеншілік қана оны небір қиын әрекеттерге жетелейді, іске батыл кірісуге себін тигізеді.
Ұстаз деген атқа адал, өз ісінің шебері - №7 Хромтау мектеп-гимназиясының дене шынықтыру пәнінің мұғалімі Сатмағамбетова Бақытгүл Тілеужанқызы, жоғарыда айтылған ұстаз борышын 25 жыл бойы мінсіз атқарып келе жатқан, нағыз маман. Бақытгүл Тілеужанқызы жоғары білімді, педагог-зерттеуші.
Әр сабағын шығармашылықпен жоспарлап, оқушыға дайын білімді бермей, бағыт бере отыра қиындықты жеңуге, ізденіс дағдыларын қалыптастыруға байланысты тапсырмалар әзірлейді. Әрбір сабақтың қызықты, тартымды өтуін, әрбір оқушы сыныптан шыға бере өзінің бүгінгі нәтижесі мен мүмкіндіктерін мақтан ететіндей сезімде болуын қадағалайды.
Талай жылғы еңбегі өз жемісін беріп, Бақытгүл Тілеужанқызы IХ жазғы оқушылар Гимназиадасына оқушыларды нәтижелі дайындап, салауатты өмір салтын кеңінен насихаттағаны үшін алғыс хат иемденді. Мұғалімдерге арналған дене шынықтыру пәні бойынша онлайн олимпиадасының жеңімпазы атанды. Орта білім беру ұйымдарының білім алушылары арасында өткізілген "Заманауи әлемдегі ғылым мен инновацияны дамытудағы жастардың рөлі" атты ІІ Халықаралық ғылыми-зерттеу жұмыстары және инновациялық жобалар байқауында оқушылары топ жарып, жетекші ретінде алғыс хатпен марапатталды. Облыстық білім беру ұйымдары мен жалпы білім беретін мектеп оқушылары арасында "Шұбар доп" Ұлттық мектеп лигасы волейбол жарысына оқушыларын шебер дайындап, жеңімпаздар қатарынан табылды. Білім саласындағы табысты еңбегі үшін Ақтөбе облысының әкімдігінің, ҚР Білім және ғылым министрлігінің алғыс хатымен марапатталды. Білім беру қызметкерлері арасында өткен облыстық спартакиадада волейболдан жүлделі ІІ орынға ие болып, дипломмен марапатталды.
“Ұстаз шәкірттерге сабақ берумен, білім үйретумен шектелген маман иесі емес, ол шәкірттердің алдағы өмірін көз алдына келтіріп, өз тәжірибесіне сүйеніп, келешекте жақсы өмір сүруіне сақтандыратын қорғаушысы”,-деп Ж.Аймауытов баға беріп кеткен ұстаз сипатына Бақытгүл Тілеужанқызы толық сәйкес келеді.
Ақтөбе облыстық білім және ғылым қызметкерлері кәсіподақ ұйымының баспасөз қызметі
