Аумақтық ұйымдардың жаңалықтары

Өз ісінің майталманы, өз мамандығына керекті қасиеттерді дамытуда жалықпайтын, өз жұмысына сыни көзбен қарайтын,тәжірибелі мамандардың бірі –Ақтөбе облысы, Алға ауданындағы №1 «Еркетай» балабақшасының ән жетекшісі Қалышева Ханымгүл Аманғалиқызы.

Қалышева Ханымгүл Аманғалиқызы Ақтөбе облысы, Шалқар қаласында 1976 жылы дүниеге келген. 1991 жылы № 1 қазақ орта мектебін үздік аяқтап, Шалқар қаласындағы музыка мектебінің баян класын үздік тәмамадаған. 1995 жылы Ақтөбе педагогикалық училищесінің музыка бөлімін үздік аяқтап, Шалқар қаласындағы №1 орта мектепте музыка пәнінен сабақ беріп, еңбек жолын бастаған. Білім саласында 26 жылдан бері еңбек етіп келеді. Ханымгүл Аманғалиқызы балаға музыканы, әр түрлі өнер түрлерін қабылдауға және түсінуге, ән айтуға, би билеуге, өзін-өзі көрсете білуге, әсемдікке үйретіп келеді. Ән жетекшісі ретінде балабақшадағы балалардың бойында музыкаға деген сүйіспеншілікті оята отырып, әдістемелік жаңалықтардың соңғы нұсқаларын ұстануға және оларды өз оқу қызметінде қолдануға тырысады.

Еңбек жолында көптеген жетістіктерге қол жеткізді. Атап айтсақ, 2019 жылы «ӘлемТалантStars» ІІІ Халықаралық шығармашылық байқау фестиваліне «Жас жеткіншектерді шығармашылық деңгейде дамытудағы жоғары кәсіби іскерлігі мен өз ісіне деген адалдығы үшін» деген алғыс хатпен марапатталды. «Самғау» республикалық ғылыми-әдістемелік журналы мен «Халықаралық педагогикалық шығармашылық пен ғылымның дамуын қолдау қоры» ұйымдастырған «Талантты жұлдыздар» байқауының вокал номинациясы бойынша балалар хоры жүлделі ІІ орынды иеленді.Республикалық «Jas tolqyn» орталығының «Тәуелсіздік- бастауы бар бақыттың» атты Республикалық өнер байқауында «Көктем» квартеті бас жүлдені иеленді. 2020 жылы «Талантты жұлдыздар» республикалық байқауында, «Қазақстаным менің» әнімен балалар хор ұжымы ІІ орынды иеленді. 2020 жылы музыка пәні оқытушылары арасында өткен, облыстық пәндік олимпиадада ІІ дәрежелі дипломмен марапатталды. 2020 жылы «Жас толқын» республикалық байқауында, Ханымгүл Аманғалиқызының жетекшілігімен бүдіршіндер бас жүлдені иеленді. Музыка пәні мұғалімдері және мектепке дейінгі ұйымдардың музыка жетекшілері арасында өткен, Е.Хасанғалиевтің әндерін орындауға арналған дәстүрлі «Атамекен» республикалық ән байқауына қатысып,топ жарып жүлделі І орынды иеленді.

Ханымгүл Аманғалиқызы қоғамдық шараларға белсене қатысып, өз-өзін шыңдап, жаңашылдыққа ұмтылудан жалыққан емес. Үнемі ізденісте жүретін шығармашыл, жаңашыл ұстаздың еңбектері республикалық, облыстық басылымдарда жарияланып жүр.

Өз тәрбиеленушілерін жетістікке жетелеп, жұмысына жауапкершілікпен қарайтын өз ісінің нағыз шебері. Алдағы уақытта Ханымгүл Аманғалиқызының еңбегіне жеміс, толағай табыс тілейміз.

Ақтөбе облыстық білім және ғылым қызметкерлері кәсіподақ ұйымының баспасөз қызметі